Program UKAS Enggau Komuniti Jematan Perintah & Rayat
DEBAK: Unit Komunikasi Awam Sarawak (UKAS) meruan nyungkakka pengawa nyadi jematan perintah enggau rayat nengah Program UKAS Begulai Enggau Komuniti serimbai mantar Gawai ba Rumah Panjai Belasau, Tuai Rumah Gara Tindin, empai lama tu tadi.
Sapit Menteri Pemansang Pengelantang Komuniti Sarawak Datuk Mohammad Razi Sitam enggau nya beterima kasih ngagai UKAS ke udah ngatur program besai reti nya nyadi pelasar bekunsika penemu enggau penerang ke amat ngagai rayat.
Iya ke mega Kaban Kunsil Nengeri (ADUN) Saribas madah, seriris enggau dunya digital maya tu, UKAS diatu nyadi pelasar media rama enggau aplikasyen pintar kelimpah media lama baka televisyen enggau radio.
"Kitai tau bulih penerang enggau berita pemansang nengeri Sarawak ari UKAS lalu ke pemadu beguna iya nya enda saru penemu ketegal berita enda amat ti tau bendar ngeruga pengelikun politik Sarawak," pia ku iya.
Iya ngena awak nya bela ngelalau rayat mayuh ngambika semampai bejimat enggau berita enda amat lebih agi ketegal pemansang teknologi maya hari tu.
Kelimpah ari nya, Kaban Parlimen Betong, Dato Dr Richard Rapu ngelalau rayat Debak semampai ngemeran ulah besepenemu sereta nyukung pengari rayat sida dikena nentu pelin pemansang Premier Sarawak ulih bela diasaika semua.
"Enti politik kitai di Sarawak entap, perintah mega lantang agi ngadu pemansang," ku iya madah.
Nangkan nya, Sapit Direktor UKAS Mohamed Faizal Shah ti ngarika Direktor UKAS madah, batang pengawa UKAS iya nya deka nentuka semua penerang bekaul inisiatif perintah datai ba genap iku rayat.
Ku iya, taja nyangka bisi penanggul ba arus internet ba sesebengkah menua, pekara nya enda nyadi penanggul laban UKAS bisi pegawai iya ba tiap sitak menua ke meri servis ngagai mensia mayuh.
Bela datai ba program nya Pegawai Pelilih Betong Kato Dorsie, Pegawai Pelilih Pusa, Anthony Peter Mihe Noel, Pegawai Tadbir Penguasa Opis Pelilih Mit Spaoh, Denny Lim, Penghulu Kadan Ot enggau Tuai Rumah Gara Tindin.-EDISI UKAS
