BETONG: Pengawa miring terus nyadi tradisyen besai reti ba komuniti Iban di Betong dikena ngintu Gawai Dayak ti nyadi lambang beterima kasih, pengelantang enggau pemanah kaul komuniti.
Sekali tu, pengawa nya diatur nyerumba Pengerami Makai Lemai Mantar Gawai Renggat Bagi Menua Betong 2026 kena malam 23 Mei tu.
Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar Datuk Gerald Rentap Jabu datai ngagai pengawa nya ti diatur di Balai Lumba Tan Sri Datuk Amar Stephen Kalong Ningkan kena Hari Lima.
Pengawa ti diatur Opis Pelilih Betong enggau kerejasama Tuai Raban Bansa enggau Tuai Komuniti (KMKK) Bagi Menua Betong nya dikena minta iring enggau pengelantang sepanjai Karnival Gawai Renggat Bagi Menua Betong ti diatur ari 2 June nyentuk 4 Julai iya nya program ninting taun ti nyadi lambang pengelantang komuniti Iban di Bagi Menua Betong.
Pengawa miring nya sebagi ari tradisyen beguna ba budaya komuniti Iban di Sarawak lalu suah diatur dikena minta berekat ngambi komuniti Iban gerai nyamai, jereki nambah enggau bulih pengelantang.
Pengawa miring ti digulu urung 100 komuniti menua nya dipejalai Lembambang Empading.
Bela datai, Residen Bagi Menua Betong Datu Richard Michael Abunawas, Pegawai Betanam Betupi Bagi Menua Betong ti mega Chairman Komiti Besai Karnival Gawai Renggat Bagi Menua Betong 2026 Leo Toni sereta Pegawai Pelilih Betong Laga Kueh.-EDISI UKAS