MERADONG: Program Mantar Gawai Kunsil Nengeri (DUN) Meradong ditampung ngagai hari ke-16 nengah penemuai ngagai Rumah Panjai Sungai Meradong enggau Sungai Petai.

Kaban Kunsil Nengeri (ADUN) Meradong Datuk Ding Kuong Hiing madah, program penemuai Mantar Gawai diatur ninting taun nadai ngira rumah panjai tauka rumah nyembuah dikena ngaul rayat sereta mendingka peminta ti dibantai bala tuai rumah enggau peranak menua.

Ku iya, penemuai baka tu beguna endar nentuka tuai berati ke utai ti nyadi sereta mereti ke isu ti ditapi komuniti ba kandang menua pesisir.

“Pejalai ngabas baka tu nentuka kitai mendingka terus sada rayat lalu ngiga chara pemadu manah nyaup mutar penanggul ti ditapi peranak,” ku iya.

Nambah ke nya, Datuk Ding nyemetak madah ke bemacham insentif enggau bantu ti dipejalai Perintah Sarawak meri pemaik ngagai semua rayat nadai ngira umur, raban bansa enggau tirai juru.

Ku iya, perintah nengeri naka ulih nentuka pengelantang rayat terus dijaga sereta pemansang ulih diasai ke semua rayat di Sarawak. - EDISI UKAS