KAPIT: Pekit Ngepan Anak Mit serimbai Festival Main Asal Kapit 2026 nyadi pelasar ngelati pesaka budaya asal ba rebak biak.

Pegawai Pelilih Kapit, Thomas Geofrey Kendawang madah, atur program nya dikearap ulih narak semangat kerejasama, penyerakup enggau pengelantang komuniti kelimpah nyempil kaul entara komuniti.

“Program baka tu beguna amat nentuka budaya komuniti menua terus dijaga enggau ditampung rebak dudi,” ku iya lebuh pekit nya di Kapit Town Square, kena Hari Lima.

Pekit nya digulu 20 penyereta nyengkaum 10 lelaki enggau 10 indu ti mandangka pekayan asal enggau penuh pengandal sereta kreativiti.

Pengawa ngambi bagi ba pekit nya mandangka minat rebak biak ngagai pesaka budaya asal enggau inisiatif meruan nentuka identiti budaya komuniti menua mengkang relevan sereta dikenang. - EDISI UKAS