BINTULU: Program Sarawakku Sayang 2026 Bahagian Bintulu terus nyadi pelasar beguna negap penyerakup komuniti lebuh beribu pengusung pupu bansa nedatka taba Padang Bilun Lama Bintulu dikena ngerichah Malam Budaya Sarawak.

Program diatur Perintah Sarawak nya mujur ngempuru komuniti bemacham etnik enggau lantang nengah bemacham program bepuguka seni, budaya enggau pemerindang ti mandangka identiti nyelai Sarawak.

Kaban Kunsil Nengeri (ADUN) Tanjong Batu, Johnny Pang Leong Ming madah, peneguh Sarawak ukai semina bepanggai ba pengaya pengeraja asal tang mega ba semangat penyerakup, bebaik enggau pengelantang rayat pupu bansa.

Ku iya, budaya ngembuan besai guna nyadi identiti sesebengkah bansa kelimpah nyadi pelasar ti ulih ngaul komuniti ari bemacham tirai juru.

"Nengah aktiviti main asal enggau kerejasama begulao ba program baka tu, mensia mayuh kelebih agi rebak biak ulih ngelala budaya diri empu sereta mereti enggau bebasa ke tradisyen raban bansa bukai," ku iya lebuh dirandau pemberita ba program nya kena Hari Enam.

Ku iya agi, Program Sarawakku Sayang ukai semina pemerindang aja tang mega nyadi pelasar negut penyerakup enggau narak semangat sayau ke menua ba rayat.

Ba pengawa nya ngemata pemerindang tanda asal bemacham etnik di Sarawak nyengkaum Iban, Kenyah, Kedayan, Penan, Vaie enggau China ti mujur narit ati bala pengusung.

Pemerindang main asal nya ukai semina mandangka penyelai pesaka tetiap raban bansa tang mega mandangka semangat begulai enggau pengelantang komuniti ti nyadi pugu Sarawak.

Program nya ngaul kerejasama entara raban enggau gerempung main asal menua begulai enggau Opis Menteri Dagang Temuai, Industri Kreatif enggau Seni Pemerindang Sarawak (MTCP) sereta Kaunsil Seni Sarawak (MSS) fikena negap enggau ngelati seni budaya lokal.

Malam nya majak richah nengah pemerindang artis lokal enggau muzik baka Mawat, Pablo Band, Karen Libau, Daniel Leong, Nurul Nesha, Dyanne Osheild, Ho Kah Sin sereta DJ Sonic ti mujur merindang beribu pengusung.

Malam Budaya Sarawak nya sekali da mandangka pengeran Perintah Sarawak dikena nyaga pesaka seni enggau budaya lokal kelimpah negap semangat beserakup sereta begulai rayat pupu bansa ba nengeri tu.

Bela datai, Sapit Sekretari Perintah Sarawak (Administrasyen) Datu Felicia Tan Ya Hua, Sapit Residen Bagi Menua Bintulu, Abang Zainuddin Abang Turkey, Sapit Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Julin Alen, Tuai Pegawai Eksekutif Kaunsil Seni Sarawak, Dr Suffian Jalet sereta Tuai Unit Matau Pejalai Projek Sarawak (SIMU), Wan Jamaluddin Wan Abdul Wahap.-EDISI UKAS