BINTULU: Kampung Kuala Nyalau deka ditangkir enggau dikemansang nyadi mengeri baru moden dikena nyukung pemansang deras sitak industri Samalaju lalu enda ngeruga peranak genturung pendiau dia.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemansang nya sebagi ari pelin besai timpuh panjai Perintah Sarawak nyentuk taun 2030 dikena negap pemansang nengeri tu nyadi palan ekonomi besai.

Ku iya, pemansang Kampung Kuala Nyalau deka ngaul nyendia genturung pendiau moden, komersial, opis sereta fasiliti sukung ungkup komuniti menua enggau komuniti ekspatriat ti gawa di Samalaju.

“Siti genturung pendiau di Samalaju iya nya Kampung Nyalau deka ditangkir lalu tu enda ngeruga peranak diatu laban kami nangkir endur nya.

“Kitai nyendia fasiliti ti diguna komuniti ekspatriat ti diau dia,” ku iya.

Iya nyebut jaku nya ba aum pemberita pengudah bejadi Program Sarawakku Sayang Bintulu 2026 ditu kena Hari Enam.

Datuk Patinggi Abang Zohari madah, pemansang nya mega meri pemaik ekonomi terus ngagai peranak genturung pendiau nengah pengawa nambah aktiviti dagang enggau peluang ekonomi.

“Kitai nyendia fasiliti moden ti menyana agi nyengkaum genturung pendiau ulih dibeli, palan komersial, opis enggau servis sukung.

“Peranak ditu enda tekeruga tang sida deka bulih pemaik ekonomi laban lebuh peranak nambah, kedai mega deka bulih untung,” ku iya.

Ku iya, tiga genturung ba Kuala Nyalau ti deka dipegulai ba pemansang nya nengah pelin besai ti mega nyerangkung Jepak enggau Samalaju.

Ku iya, pemansang baru nya deka nyadi sistem sukung rama ngagai pemeranak puku ti datai ke Samalaju kelimpah negap rentayan pemansang Bintulu dudi hari. - EDISI UKAS

Pemberita : Grace John Lee
Gambar : Ameerul Syafiq Khir