KUALA LUMPUR: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg meri sukung moral ngagai tim Kuching City FC (KCFC) lebuh datai ba Stadium Nasional Bukit Jalil meda pekit kepenudi Piala Malaysia 2025/2026 ngelaban Johor Darul Ta’zim (JDT) malam tu.
Iya ti tembu bejadi Program Sarawakku Sayang Bagi Menua Bintulu pagi tadi datai di Stadium Nasional Bukit Jalil urung pukul 8.45 malam.
Penatai Premier Sarawak diambat Menteri Kereja Raya Dato Sri Alexander Nanta Linggi, Menteri Pemansang Indu, Ruang Bilik enggau Komuniti Dato Sri Nancy Shukri, Sapit Menteri Pengerai Dato Hanifah Hajar Taib, Sapit Menteri Pemansang Genturung Pendiau enggau Kandang Menua Datuk Rubiah Wang sereta Tuai Sekretari Politik Premier Sarawak ti mega Presiden KCFC Dato Fazzrudin Abdul Rahman.
Bela datai, Menteri Besai Johor Dato Onn Hafiz Ghazi sereta raban pengatur Gerempung Main Bol Malaysia (FAM) enggau Malaysian Football League (MFL).
Penatai Datuk Patinggi Abang Zohari enggau bala tuai perintah nengeri ngerichahka agi panjung urung 20,000 penyukung KCFC ti nedatka Stadium Nasional Bukit Jalil kenyau ari pukul 5 lemai tadi.
Pekit entara KCFC enggau JDT belabuh pukul 9 malam.
KCFC ba pelasar pemadu manah nurai sejarah baru mai trofi gah nya meraka Tasik China Selatan enti menang malam tu. - EDISI UKAS
