BINTULU: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngabas dua projek pemansang besai di Bintulu serimbai Program Sarawakku Sayang (SKS) Renggat Bagi Menua Bintulu kena Hari Enam ngaul Projek Jalai Begembar ari Jematan Kemena ke Padang Bilun Bintulu sereta Projek Skim Pengentap Khas (SPK) Jelutong di Jepak.

Pejalai ngabas dipun ba taba Projek Jalai Begembar ari Jematan Kemena ke Padang Bilun Bintulu mungkur ngaga jalai empat arung sepanjai 4.1 kilometer nyambung Selingkut Jalai Jepak nuju Selingkut Jalai Padang Bilun Bintulu.

Projek nya mega nyerangkung ngaga dua arung P-turn, siti jematan pemanjai 95 meter, jalai penyambung ari Padang Bilun Bintulu nuju pasar sereta pengawa nyeruri Selingkut Jalai Padang Bilun Bintulu.

Pejalai projek nya ditaga ulih ngemandak timpuh pejalai ari pasar Bintulu nuju Padang Bilun Bintulu sereta jalai nuju Tatau enggau Sibu, kelimpah nyendia jalai altenatif dikena mutar penanggul jalai sekut.

Nitih ke taga, projek nya disadang tembu kena Oktober 2027.

Udah nya, Premier Sarawak nampung pejalai ngabas Projek Skim Pengentap Khas (SPK) Jelutng di Jepak ti dipejalai nengah inisiatif Perintah Sarawak ngena Bintulu Development Authority (BDA) dikena nyendia genturung pendiau ti manah, lantang enggau ulih diberi ungkup rayat.

Projek nya ngaul ngaga 111 unit rumah nyerangkung 97 unit ungkup Stage 1 enggau 14 unit ungkup Stage 2, ke alai semua projek diatu tembu.

SPK Jelutong ukai semina nyendia genturung pendiau bisi kualiti ngagai peranak tang mega disikap perengkaguna pemun nyengkaum jalai, sistem tangki ai, bekal kuasa karan enggau ai nentuka pengelantang komuniti lokal.

Sama datai, Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Sapit Sekretari Perintah Sarawak (Administrasyen), Datu Felicia Tan Ya Hua sereta temuai dipebasa bukai. - EDISI UKAS

Pemberita: Gabriel Rommy
Gambar: Ameerul Syafiq & Muhd Zulfadli