BINTULU: Sarawak merambu pemansang teknologi kuasa solar baru ti ulih nyimpan kuasa lama agi lalu enda bepanggai ba sistem bateri nyimpan kuasa (BESS) nengah pansik begulai enggau pakar universiti lokal.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perambu nya dikerandau begulai enggau Mandal Canselor Universiti Kebangsaan Malaysia (UKM) enggau raban pemansik fakulti injiniring ti bisi penau ba bidang kuasa.

Ku iya, Sarawak ngembuan pengulih besai ba industri semikonduktor enggau bahan mata baka silika sereta silikon ti ulih diserungkai dikena ngasilka teknologi nyimpan kuasa serak baru.

“Aku merambu ngagai sida bejalaika tungkap. Enti sida ulih ngasilka panel solar ti ulih beretan lama agi.

“Diatu, panel solar semina ulih beretan urung empat jam sebedau disukung bateri BESS,” ku iya.

Iya madah munyi nya ba aum pemberita pengudah bejadi Program Sarawakku Sayang Bintulu 2026, ditu kena Hari Enam.

Ku Datuk Patinggi Abang Zohari, Sarawak bisi pemansut bahan mata baka pasir silika enggau silikon ti ulih dipegulai enggau besi bukai dikena nambah kapasiti nyimpan kuasa nyentuk 12 jam.

“Kitai bisi material dikena ngasilka silika enggau silikon.

“Engka bisi mega bahan mata bukai ti ulih diadu chara hibrid nyentuk ulih nambah pengetan kuasa ari empat nyentuk 12 jam lalu enda ngena bateri,” ku iya.

Ku iya, teknologi nya ulih nyadi pemekal kuasa normal dudi hari seraya nyendia ruang nengkebang teknologi baru ti ulih rembus makit global.

Nya kebuah, ku iya, tungkap silik meseti diadu kelebih agi ba bidang metalurgi ngambi berati ke gaya pasir silika enggau gempung nya enggau besi dikena nambah kapasiti nyimpan kuasa.

Datuk Patinggi Abang Zohari mega nerang ke pemansang teknologi nyimpan kuasa nya enggau pemansang superkomputer enggau mindahka data jam nyata bepelasarka peneras lampu.

Ku iya, enti teknologi nyimpan data kapasit tinggi ulih dijapai, teknologi nyimpan kuasa enggau kapasiti besai agi mega ulih dikemujur nengah pansik saintifik.-EDISI UKAS

Pemberita : Grace John Lee
Gambar : Ameerul Syafiq Khir