BINTULU: Kaunsil Pengintu Pengelantang enggau Lumba Staf Perintah Sarawak (MAKSAK) Indu Sarawak ngabas pesakit lalu nyua bantu serimbai Gawai di Hospital Bintulu kena Hari Lima.
Program ngintu pengelantang ninting taun diatur MAKSAK nya diulu ke anak Premier Sarawak, Dayang Norjihan begulai enggau Chairperson MAKSAK Indu Sarawak, Dato Baduyah Bujang dikena ngabas pesakit enggau raban kurang penatai pemisi.
Entara atur program iya nya ngabas Wad Nembiak Mit Hospital Bintulu, ke alai tetiap pesakit nerima pemeri RM100 ari Turu Gerempung Ngintu Pengelantang MAKSAK Indu Sarawak.
Pemeri nya dikena meri pengaga ngagai bala pesakit kelebih agi nembiak mit ti enda ulih ngintu Gawai Dayak enggau sida sebilik.
Kelimpah ngabas pesakit, MAKSAK Indu Sarawak mega nyuaka hamper SARA Cares ngagai Direktor Hospital Bintulu, Dr Suzalinna Sulaiman.
Pia mega, bisi 20 kutak barang renchit berega RM100 siku diagih ngagai staf hospital ti kurang penatai pemisi dikena nyaup ngelempung tating belanja ti majak nambah.
Bintulu nya palan kedua ngatur program SARA Cares taun tu pengudah inisiatif nya dikerembai ngagai bagi menua bukai di Sarawak.
Program nya asil buah runding Sekretari Perintah Sarawak ti mega Yang Dipertua MAKSAK ti mega Sekretari Perintah Sarawak, Datuk Amar Mohamad Abu Bakar Marzuki ti bepelasarka konsep bantu Sumbangan Asas Rahmah (SARA) dipejalai perintah sebedau tu.
Nengah inisiatif nya, tuai opis enggau pegawai kanan Servis Perintah Sarawak diperansang ngagihka baru bantu SARA RM100 ke Tabung SARA Cares sebedau agih belanja nya dikena meli barang diguna ngambi diagih ngagai raban ti begunaka bantu ba selampur nengeri.
Ba program nya, MAKSAK Indu Sarawak mega nyua bantu MAKSAK Cares ngagai dua orang pinchin iya nya Jani Ding enggau Abdul Manap Nahar ti ditepan penyakit raya.
Seduai nya nerima bantu RM500 dikena mayar ungkus berubat lengkas ba Hospital Besai Kuching.
Bisi mega diatur pengawa nyua geran ninting taun ngagai Datin Rubiah Nyurang ti mega Chairperson MAKSAK Indu Bagi Menua Bintulu kelai sukung ngatur aktiviti ngintu pengelantang ba renggat bagi menua.
Program nya mandangka pengeran MAKSAK Indu Sarawak dikena negap semangat begulai, ngabas pesakit sereta nyaup raban ti begunaka perati enggau sukung. - EDISI UKAS
