KUCHING: Pengerami Ngintu Gawai Dayak 2026 Renggat Sarawak deka diatur richah enggau mayuh program pengawa asal enggau main asal ke ditaga pengelama dua hari berengkah 20 ngagai 21 Jun tu.

Sapit Premier Sarawak, Datuk Amar Douglas Uggah Embas madah, pengerami diatur komuniti Iban nya deka dipun enggau pengawa ‘Niti Daun’ kena 20 Jun ke disadang digulu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Ku iya, batang pengerami deka diatur 21 Jun nengah Pengerami Makai Lemai Gawai Dayak Renggat Sarawak ke deka diatur Palan Konvensyen Borneo Kuching (BCCK).

“Pengerami nya mega disadang digulu Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, Menteri Besai, Dato’ Seri Anwar Ibrahim sereta Premier Sarawak.

“Pengawa besikap lanchar lalu kami andal ke Gawai Dayak taun tu deka mandangka pengawa narit ati nyadi sebagi ari pemansang ngaul pengelantang sereta Sarawak ke likun ke alai kami deka ngayanka pengawa asal enggau budaya kitai,” ku iya.

Iya nyebut pekara nya ba aum media pengudah ngetuai ke Aum Komiti Besai Ngintu Gawai Dayak Renggat Sarawak 2026 di Begunan Kunsil Nengeri (DUN) Sarawak kena Hari Satu.

Datuk Amar Douglas mega madah ke pengerami serak tu deka diisi sekeda program khas ti deka ngasuh pengusung tekenyit sekumbang dua hari diatur kena 20 enggau 21 Jun ila.

Ngenang pasal ‘Niti Daun’, iya madah ke bisi 99 kontinjen deka ngambi bagi ba program nya nyengkaum kontinjen ari Sabah.

Ku iya, pengawa bejalai bebala mayuh nya deka berengkah ari Begunan Tun Jugah lalu tembu ba Tebing Ai Kuching enggau urung 3,000 pengusung disadang datai ngerichah pengawa nya.

Sama datai ba aum media nya Menteri ba Opis Premier Sarawak, Dato Sri John Sikie Tayai, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil, Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Sapit Menteri Pengangkut Sarawak, Datuk Dr Jerip Susil, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh sereta Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit.-EDISI UKAS

Pemberita: Ahmad Daniel Faiz