KUCHING: Mensia mayuh dilalau besaup nyaga pemeresi enggau pengelikun di Jematan Batang Lupar 1 ke diatu nyadi siti ari kelai menua baru sereta pematak dagang temuai di Sarawak.
Sapit Premier Sarawak Datuk Amar Douglas Uggah Embas madah, jematan ke udah tembu digaga nya nerima timbal chukup manah ari peranak menua enggau pengusung ari luar Sarawak.
Ku iya, penyampau tubuh bala pengusung ke nambah ngagai endur nya begunaka kerejasama semua raban nentuka endur nya seruran beresi, meruan enggau likun ditengah.
“Ba raban Opis Kereja Raya (JKR) Sarawak, kami benung ngatur pengawa nyendiaka endur muai uras lalu deka terus matau endur nya laban kitai deka ke endur tu seruran beresi enggau narit ati,” ku iya.
Iya nyebut pekara nya lebuh dirandau pemberita pengudah ngetuaika Aum Komiti Besai Ngintu Gawai Dayak Renggat Sarawak di Begunan Kunsil Nengeri (DUN) Sarawak kena Hari Satu.
Datuk Amar Douglas madah baru, jematan nya bisi pengulih besai nyadi palan dagang temuai laban majak mayuh pengusung ari menua luar datai laban deka meda empu struktur ikonik nya.
Nya alai, iya meransang semua raban, nyengkaum peranak menua nya ngambi bekerejasama nyaga reta enggi rayat Sarawak lalu enda ngamah ke nama Tanah Kenyalang.
“Jaga mih perengkaguna tu enggau manah ngambi nya terus dikemegah kitai jemah.
“Raban JKR deka bejalaika pengawa ke patut dikena nentuka pemeresi seruran tejaga nyadi siti ari penteba Batang Lupar," ku iya.
Ngenang silik pasal pekara pengelikun, Menteri Infrastruktur enggau Pemansang Penyangkai Kapal Sarawak ngelalau penguna ngambi enda deriba bejimat lalu enda deriba ngelui ari laju ke ditetapka.
Iya mega madah, JKR benung nyerenih sekeda pekara bekaul perengkaguna enggau pengawa ngintu ba endur jematan nya sereta meri ripot silik kandang dua minggu da. -EDISI UKAS
