KUCHING: Perintah Sarawak seruran ransing ngelati pemansang pelajar nengah geran penyampau RM10 juta ngagai Sekula Sekondari Peribit China (ICSS) di nengeri tu.

Agih belanja nya udah disua Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg serimbai penemuai basa deligit Serakup Kaunsil Pengatur Sekula Sekondari Peribit China Besgempung Sarawak di Kompleks Satria Pertiwi, ditu, Hari Satu.

Ngetuai ke deligit nya Chairman serakup, Temenggong Dato Vincent Lau Lee Ming disempulang Sapit Chairman, Dato Sri Richard Wee Liang Chiat, Tukang Wang, Dato Seri Song Tiing Seng sereta Penulung Sekretari Besai, Kuang Wei Hua.

Inisiatif nya ngayanka polisi inklusif Perintah Sarawak ke seruran ngaku pangku pengawa semua pelajar dikena nempa modal mensia bisi kualiti sereta nyukung pemansang nengeri enggau menua.

Kenyau ari taun 2014, perintah nengeri seruran meri bantu ninting taun ngagai sekula nya, enggau penyampau semua bantu manggai RM102 juta ungkup timpuh 13 taun.

Agih belanja nambah ari RM3 juta ngagai RM10 juta setaun mega mantu ngelempungka tating belanja raban pengatur sekula sereta nentuka pemansang institusyen pelajar nya seruran diadu.

Ba penemuai nya, raban serakup mega meri terima kasih ke sukung perintah nengeri ke dipeda nyadi penyungkak penyulut akademik sereta nempa graduet ke ulih besemekih.

Sukung nya mega seriris enggau chara Sarawak ke ngemeratka pelajar ti lurus nadai ngira pelajar, nyengkaum nengah Skim Pelajar Tinggi Pechuma Sarawak (FTES) ke meri pemaik ngagai beribu nembiak.

Naka suku keterubah 2026, sepenyampau 4,694 nembiak bulih pemaik ari skim nya, nyengkaum 94 nembiak ke ngembuan Sijil Peperiksaan Bersepadu (UEC) ari sekula sekodari peribit China ke dipelanja nampung belajar. -EDISI UKAS