KUCHING: Pengerami Makai Lemai Gawai Dayak Renggat Sarawak 2026 ke deka diatur di Palan Konvensyen Borneo Kuching (BCCK) kena 21 Jun tu disadang nyadi nyadi batang Pengerami Ngintu Gawai Dayak taun tu enggau ngempuruka bala pemesai nengeri enggau menua.
Sapit Premier Sarawak ke mega Chairman Komiti Pengatur Ngintu Gawai Dayak Renggat Sarawak 2026, Datuk Amar Douglas Uggah Embas madah, pengerami besai nya deka richah enggau penatai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi.
Ku iya Menteri Besai, Dato’ Seri Anwar Ibrahim sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mega disadang datai ngulu pengerami nya.
“Sehari tu aku enggau bala kaban komiti pengatur ngatur penemuai basa ngagai Tun Pehin Sri Dr Wan Junaidi ungkup nyua surat kangau rasmi ngulu pengerami nya,” ku iya ngagai pemberita pengudah ngatur penemuai basa ngagai Yang di-Pertua Negeri Sarawak di Astana Negeri Sarawak kena Hari Satu.
Iya madah baru, entara isi program ke deka ngerichah pengerami nya iya nya pengawa Bebiau Pengabang enggau Gawai Toast ke nyadi lambang bebasa ke adat sereta budaya raban bansa Dayak.
Kelimpah ari nya, bala pengabang mega deka diperindang enggau panggau teater muzikal eksklusif ke nyagu “Ruai to the World” ke mandangka penyelai pesaka, budaya enggau identiti raban bansa Dayak ngagai bala mayuh.
Datuk Amar Douglas madah, Pengerami Ngintu Gawai Dayak Renggat Sarawak 2026 nyagu sulu jaku Segulai Sejalai ke mai reti semangat segulai sejalai, penyerakup enggau begempung ba rayat pupu bansa di nengeri tu.
Dulu ari nya, iya udah ngetuaika raban Komiti Pengatur Ngintu Gawai Dayak Renggat Sarawak 2026 ngatur penemuai basa ngagai Tun Pehin Sri Dr Wan Junaidi ngambi nyua empu surat kangau rasmi ke pengerami nya.
Sama bisi nemuai basa iya nya Menteri ba Opis Premier Sarawak, Dato Sri John Sikie Tayai, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu, Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil sereta Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat.-EDISI UKAS
