PADAWAN: Pengerami Ngintu Gawai Dayak ukai semina pengerami ninting taun komuniti Dayak, tang mega nyadi lambang ngenang pengawa, pemujur enggau penyerakup komuniti nempa pengidup ti menyana agi sereta lantang di Sarawak.
Sapit Menteri Pengangkut Sarawak (Langit enggau Darat) Datuk Dr Jerip Susil madah, semangat Gawai mandangka reti beterima kasih, begulai enggau lantang ti nyadi pugu peneguh komuniti Dayak kenyau ari kelia.
“Gawai ukai semina pengerami, tang mega lambang ngenang pengawa, pemujur enggau penyerakup komuniti ke alai konsep Gawai nya dikena ngerami pemujur ba pengidup, sekali ke ba ruang bilik, gawa, pelajar tauka komuniti seraya negap identiti enggau pemereti ati komuniti Dayak,” terang iya.
Iya madah munyi nya ba Pengerami Makai Lemai Gawai Pelilih Mit Padawan 2026, ditu kena Hari Enam.
Nambah ke nya, Datuk Dr Jerip mega ngemeratka pemesai guna semangat kerejasama enggau penyerakup nyadi pugu pemansang Sarawak nipak juluk perintah nengeri.
Ba pengerami sebaka, Kaban Kunsil Nengeri (ADUN) Mambong nya mega nyua pemeri Gawai ngagai 12 penerima ari raban begunaka bantu dikena ngelempung tating belanja sida besikap ngintu hari besai nya.
Sama datai, Pegawai Menguasa Opis Pelilih Mit Padawan Julius Scott Sapong enggau Pemancha Bidayuh Pelilih Kuching Raymond Jihad. - EDISI UKAS
