KAPIT: Bisi 28 kontinjen ngaul agensi perintah, gerempung veteran, raban budaya sereta pengari rumah panjai begempuru ngemujur Pengawa Bejalai Beraban Niti Daun serimbai Kapit Cultural Festival (KCF) 2026 ti richah diatur di Kapit Town Square kena Hari Enam.

Program nya ukai semina mandangka penyelai pesaka asal enggau seni budaya komuniti menua, tang mega nyadi lambang penegut penyerakup pupu bansa di Bagi Menua Kapit.

Tetiap kontinjen mandang pengawa bekenaka pekayan asal, identiti etnik sereta elemen main asal ti ngayan bemacham adat enggau pesaka asal komuniti dia.

Program nya mega nerima timbal ti chukup manah ari komuniti menua sereta pengusung ti datai dikena meda pengerichah festival budaya ninting taun nya.

Pengawa Bejalai Beraban Niti Daun dipeda nyadi pelasar beguna negap semangat beserakup enggau begulai komuniti pupu bansa sambil ngelaku Kapit nyadi palan dagang temuai budaya ti kaya enggau adat sereta tradisyen nyelai.

Kelimpah mandangka pesaka budaya komuniti menua, festival nya mega meri empas positif ngagai sektor dagang temuai enggau ekonomi lokal nengah penatai pengusung ari bemacham endur ti majak nambah.

Penatai mayuh kontinjen enggau pemerindang main asal sereta identiti etnik mega mandangka pengelain Kapit nyadi entara endur ti kaya enggau bemacham budaya di Sarawak.

Bela datai, Sapit Menteri Digital ti mega Kaban Parlimen Hulu Rajang Datuk Wilson Ugak Kumbong, Kaban Kunsil Nengeri (ADUN) Pelagus Wilson Nyabong Ijang, Sekretari Politik Premier Sarawak Watson Awan Jalai, Pegawai Pelilih Kapit Thomas Geoffrey Kandawang, Chairman Kaunsil Pelilih Kapit Andy Lawrence, Pegawai Pelilih Bukit Mabong Jabang Juntan, pengari Pegawai Pelilih Song Willy Watson Awan, Tuai Polis Pelilih Kapit Rohana Nanu sereta Pemancha Pasang Tuba. - EDISI UKAS