KUCHING: Pangku pengawa palan servis pengari rayat enggau Unit Komunikasi Awam Sarawak (UKAS) terus ditegap nentuka pengawa ngenatai penerang perintah ulih dipejalai nemban ngagai rayat nyentuk renggat baruh.

Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam), Datuk Dr Abdul Rahman Junaidi madah, pejalai bemacham inisiatif perintah nunjukka pengeran Perintah Sarawak diiring Premier Sarawak nentuka pemansang nengeri ulih diasai ke semua rayat chara inklusif.

Ku iya, pengawa ngenatai penerang bekaul bantu perintah meseti dikerembai nentuka rayat nyengkaum ba menua pesisir enggau menua ulu enda dikelaung ari ngasai ke pemaik ti disedia.

“Palan servis meseti semampai ransing, ngelantang rayat enggau nguasa penerang pemadu baru ngambi ulih nyaup pengari rayat ngenatai servis pemadu manah ngagai mensia mayuh,” ku iya.

Iya madah munyi nya ba Program Ungkup Rayat Begulai Enggau Palan Servis Zon Selatan ditu kena Hari Satu.

Bela datai, Direktor Unit Komunikasi Awam Sarawak, Awang Putrayusrie Awang Redzuan.

Iya ti mega ADUN Pantai Damai madah, perintah nyendia mayuh bantu nyerangkung berubat, pelajar, peluang gawa sereta bantu ngintu pengelantang rayat ari ada nyentuk udah tuai.

Nambah ke nya, iya mega madah ke Sarawak nengah Program Sarawakku Sayang (SKS) diatu nyendia lebih 21,000 peluang gawa nengah mayuh sektor perintah enggau kompeni dikena meri peluang ngagai anak Sarawak ti gawa ba menua luar ngambi gawa baru ba menua diri empu.

Ku iya, pemansang infrastruktur baka jalai besai, jalai tebing tasik, jematan enggau rentayan jalai mega terus ditegap dikena nambah rentayan sereta aksesibiliti di selampur nengeri.

“Jematan Batang Lupar 1 ti belabuh ulih ditengah nya jematan ngelayang sungai pemadu panjai di Malaysia nyadi lambang pengeran perintah negap rentayan penyambung Sarawak,” ku iya. - EDISI UKAS