KUCHING: Rang Undang-Undang (RUU) Orang Tuai diatu ba renggat dikemanah nengah randau begulai enggau mayuh raban bekaul nyengkaum gerempung ti ngari ke raban orang tuai ba menua tu.
Menteri Pemansang Indu, Ruang Bilik enggau Komuniti, Dato Sri Nancy Shukri madah, opis menteri iya agi nerima mayuh timbal enggau perambu ti meseti dialus ke agi sebedau RUU nya dipejurai ngagai Kabinet lalu nangkan nya ngagai Parlimen.
“Taja RUU tu nyau deka tembu, agi tubah timbal diterima ari raban bekaul kelebih agi gerempung ti ngari ke orang tuai ti deka ke sekeda pekara dipasuk dalam RUU nya.
“Bisi mega madah ke atur diterit ngagai anak ti enda ngibun apai indai tang bisi ga penemu bukai ti minta kami berati ke peneleba menua bukai sebedau ngaga sebarang pemutus,” ku iya.
Iya madah munyi nya lebuh dirandau pemberita pengudah bejadi Pengerami Hari Indai Renggat Sarawak 2026 di Pustaka Negeri Sarawak, ditu kena Hari Satu.
Dato Sri Nancy mega madah, opis menteri iya udah diberi timpuh enam bulan bejuraika RUU nya ke Kabinet sebedau dibai ke ke Parlimen.
Ku iya, taja sesyen advokasi enggau randau begulai enggau raban bekaul deka ditampung, opis menteri mega meseti netapka timpuh nentuka pengawa bejurai enda majak dilanjar.
“Kitai deka terus ngatur randau seraya nganjung baru timbal ti diterima ngagai agensi bekaul ngambi ditungkap enggau dialus ke agi,” terang iya. - EDISI UKAS
