KUCHING: Pengawa ngenatai penerang ti betul enggau mudah dipereti beguna endar nentuka rayat enda kena tinggal ari nerima pemaik bemacham inisiatif perintah Sarawak.

Direktor Unit Komunikasi Awam Sarawak (UKAS), Awang Putrayusrie Awang Redzuan madah, agi bisi sekeda komuniti kelebih agi ba genturung pendiau ti apin bulih penerang bekaul bantu perintah baka Skim Kenyalang, Bantu Barang Diguna Pemun Sarawak (SKAS), bantu orang tuai enggau bantu ngintu pengelantang bukai.

“Taja promosyen udah mayuh dipejalai, agi tubah komuniti ti apin nemu pasal bantu enggau inisiatif perintah.

“Nya kebuah, program meri penerang baka tu meseti ditampung nentuka penerang datai terus ngagai rayat,” ku iya.

Iya madah munyi nya lebuh bejaku ba Program Ungkup Rayat Begulai Enggau Palan Servis Zon Selatan, ditu kena Hari Satu.

Program nya dipenyadi Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam), Datuk Dr Abdul Rahman Junaidi.

Nambah ke nya, iya mega ngemerat pemesai guna ngena media rama nyadi pelasar beguna ngerembai penerang pemadu baru nipak ubah chura komuniti ti diatu bepanggai ba pelasar digital dibanding media lama.

Ku iya, pengawa ngerembai berita bula enggau penerang enda betul mega nyadi pemar besai ti begunaka kerejasama semua raban ngambi nerang ke penerang ti amat ngagai komuniti.

“UKAS enda ulih mansang kediri. Nya kebuah, kitai begunaka kerejasama semua raban nyengkaum palan servis komuniti nyadi bakih strategik dikena nyaup ngerembai penerang ti betul,” ku iya.

Kelimpah ari nya, ku iya, UKAS mega nyendia mayuh pelasar enggau produk komunikasyen nyengkaum portal arkib digital ti nyimpan jaku, gambar, video sereta dokumentasyen rasmi perintah nyadi malin dudi hari.

Dulu ari nya, bisi mega pengawa bekunsi penerang ari pegawai Opis Menteri Pelajar, Inovasyen enggau Pemansang Penau Sarawak, Yayasan Sarawak sereta Opis Menteri Pemansang Indu, Nembiak Mit enggau Pengelantang Komuniti. - EDISI UKAS