SIBU: Urung 70 peratus nembiak diselinting ngulu Town Hall begulai enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg serimbai Hari Sarawak ti deka diatur kena 22 Julai tu di Balai Canselor Tun Abdul Taib Mahmud Universiti Teknologi Sarawak (UTS).

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, program randau nya deka nyadi pelasar pemadu manah ungkup raban nembiak berandau terus enggau Premier Sarawak.

“Aku ngarap raban nembiak di Sibu ila ngena peuang tu datai ngagai Town Hall tu ngambi betanya kediri ngagai YAB Premier pasal pengadang, tunga kuing enggau inspirasyen sida.

“Aku andal enggau pechaya ke YAB Premier bisi saut ungkup semua nya,” ku iya lebuh ngabas taba besikap ngatur program nya di UTS, kena Hari Satu.

Sibu nyadi palan ngintu Hari Sarawak 2026 ari 20 nyentuk 22 Julai tu enggau bemacham aktiviti ngaul komuniti.

Nya nyengkaum Karnival Bejual, Zumba sereta Pengawa Makai Selamat ti diatur ba sekeda endur ngelingi mengeri Sibu.

Hari nyadi kena 22 Julai deka richah enggau Program Unity Walk, dientudi program Townhall begulai enggau YAB Premier Sarawak di UTS muak ke lemai.

Pengerami pengelama tiga hari nya tembu nengah Gempuru Hari Sarawak enggau Konsert Rayat.

Datuk Abdullah mega madah, nyadi pematak randau ungkup sesyen nya ila, iya mega sedia mantaika sekeda pekara beguna ti nyadi pemaik besai ungkup raban nembiak nya.

Ngenang pengawa milih endur, Datuk Abdullah nerang ke UTS dipilih laban nya mai reti ti chukup signifikan ngagai visyen Perintah Sarawak diatu.

“Balai ti besai tu di Universiti Teknologi Sarawak nyadi siti simbolik universiti enggi Sarawak, ti mega sebagi ari juluk perintah bebendar meri pelajar nadai bebayar nyengkaum universiti bukai,” ku iya.

Nambah ke nya, Kaban Kunsil Nengeri (ADUN) Semop nya mega madah ke Hari Sarawak sekali tu besai reti laban ngelai taun kesemilan Datuk Patinggi Abang Zohari ngemudi nengeri nyadi Premier Sarawak.

Iya pechaya ke pengerami besai tu di Sibu nya siti basa berindik ari Zon Tengah diatu nyadi saksi ngagai pengawa bejalaika bemacham agenda pemansang fizikal.

“Aku andal ke mayuh pekara kelebih agi di zon tengah tu, pemansang infrastruktur baka jalai enggau jematan, mayuh nyadi ba zon tengah tu.

“Kena mih peluang tu ungkup komuniti ba zon tengah berati ke utai ke deka nyadi ba aktiviti dudi hari Sarawak,” terang iya.

Iya madah baru, pengawa ngatur hari besai di Sibu nya mega narit ati laban penuduk geografi Zon Tengah tu semak enggau pelilih ti nyadi sebagi ari endur bujang berani ti nagih penumbuh sereta hak Sarawak nengah Sempekat Malaysia 1963 (MA63) ada.

Bela datai, Kaunselor Mohammed Abdullah Izkandar Dato Roseley, Pengerejista UTS Jimmy De Rozario @ Abdul Rahman, Sekretari Perbandaran Majlis Perbandaran Sibu (MPS) Henry Jalin Watt enggau bala bukai. - EDISI UKAS