KUALA LUMPUR: Perintah Sarawak begulai enggau Opis Menteri Digital benung ransing besikap nyerumba pengawa bejadi Kluster Idar Industri Sarawak (TIC), inisiatif idar industri keterubah di Malaysia nengah langgur Forum Ekonomi Dunya (WEF).

Pekara nya ditetapka nengah siti randau strategik sehari tu ngaul Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel begulai enggau Menteri Digital, Gobind Singh Deo dikena nyeraris program enggau batang tuju pengawa besejarah nya.

Pengawa bejadi TIC Sarawak deka diatur kena 11 June 2026 di Borneo Convention Centre Kuching lalu diatur begulai perintah nengeri sereta World Economic Forum ti deka diari ke Direktor Pengatur Pengawa, Neo Gim Huay.

Ku Dato Sri Dr Muhammad Abdullah Zaidel, pengawa nya deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg begulai enggau Gobind Singh Deo sereta deka mandangka randau panel beprofil tinggi ngaul tuai perintah, pemekuh industri, pemeranak puku enggau bakih strategik ekosistem ari serantau tu.

Bela datai ba aum besikap iya nya Tuai Sekretari Opis Menteri Digital, Fabian Bigar sereta Tuai Pegawai Eksekutif MyDIGITAL Corporation, Adrian Marcellus.

TIC Sarawak dipeda nyadi siti pemujur besai ungkup nengeri enggau menua laban nyadi kluster keterubah di Malaysia ti ngulu inisiatif global Transitioning Industrial Clusters diatur World Economic Forum.

Inisiatif nya deka ngentapka penuduk Sarawak nyadi hab transformasyen industri serantau, kelebih agi ba sukut munas karbon, ngena kuasa beresi sereta pemansang ekonomi meruan ti setipak enggau agenda pemansang nengeri enggau nasional. -EDISI UKAS