Perintah Sarawak Keran Ngerumban Pengawa Nyukat Tanah NCR
SARIKEI: Perintah Sarawak naka ulih ngerumban pengawa nyukat enggau meri surat pala tanah Adat Bansa Asal (NCR) nengah bemacham inisiatif ti dipjalai ba selampur nengeri.
Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, naka diatu urung 1.2 juta hektar tanah NCR mujur disukat ari manggai tiga juta hektar ti dikelala ungkup pengawa nyukat.
Ku iya, perintah nengeri mega nyendia agih belanja sepenyampau
RM40 juta ninting taun nentuka pengawa nyukat enggau meri surat pala tanah rayat ulih dirumban.
Ku iya, pengawa nya ukai semina ngaul inisiatif nengah Seksyen 6 lalu dikerembai nengah Seksyen 18 Kanun Tanah Negeri nentuka tanah nya ulih diberi hak ngempu lalu dikenuku ari sukut undang-undang.
“Perintah nengeri endang keran mutar isu tanah NCR enggau inisiatif tu ukai baru dipejalai maya nyau deka semak pengawa bepilih tang lama udah dipejalai,” ku iya.
Iya madah munyi nya pengudah ngulu Pengawa Nyua Chek Tanggungpengawa Rama Korporat (CSR) di Palan Opis Perintah Nengeri Sarawak (IAC), kena Hari Dua.
Ngenang silik, iya madah, entara pemar besai ti ditapi ba pengawa nyukat iya nya nadai pengempu tanah maya pengawa nyukat dipejalai nyentuk pengawa ngerintis mar dipejalai begulai.
Ku iya, perintah nengeri mega madah ke 367 staf baru dikena negap penau Opis Tanah enggau Survei ba selampur Sarawak.
Iya mega nyemetak madah ke isu NCR enda patut nyadi puku politik laban perintah terus bejalaika pengawa mutar chara konsisten ke pemaik rayat. - EDISI UKAS
