TATAU: Bisi 39 organisasyen di Kakus nerima agih belanja Projek Mit Pemansang Menua Pesisir (MRP) sepenyampau RM978,000 dikena nyukung atur aktiviti komuniti enggau pemansang menua pesisir.

Menteri ba Opis Premier Sarawak, Dato Sri John Sikie Tayai madah, penerima nyengkaum Komiti Pemansang enggau Pengelikun Genturung Pendiau (JKKK), Gerempung Apai Indai enggau Pengajar (PIBG) sereta bemacham gerempung dia.

Ku iya, belanja ti diagih nya meseti dikena manah ungkup pemansang komuniti nyengkaum nyeruri rumah panjai sereta aktiviti ngaul komuniti.

“Aku deka semua penerima ngena agih belanja tu enggau manah lalu ukai dibagi ngena mata duit.

“Tetiap pengawa ngena belanja meseti diterang maya baum JKKK nentuka atur belanja lurus enggau diatur manah agi,” ku iya lebuh bejadi Pengawa Nyua MRP Kakus di Bilik Baum Opis Pelilih Tatau kena Hari Dua.

Ku iya agi, Kakus bisi lebih 400 rumah panjai ke mega entara endur pemadu mayuh rumah panjai di Sarawak ngujungka pengawa ngagihka belanja dipejalai berenggat.

Nambah ke nya, Pegawai Pelilih Tatau, Calvin Ligong ngingatka semua penerima nganjung ripot belanja ngagai Opis Pelilih ungkup tuju rikod enggau matau pengawa ngena agih belanja.

Ku iya, ripot penuh ti dibantai maya baum JKKK rumah panjai beguna nentuka atur belanja ti lurus agi kelimpah nyeliah sebarang penyarut bekaul pengawa ngena belanja ti diterima.

Sama datai, Sekretari Politik Premier Sarawak Susan Clement Ingun, Sapit Pegawai Pelilih Tatau Winnie Dian, Penghulu Jeffery Irut sereta Penghulu Nelson Chuat Glong. -EDISI UKAS