PAKAN: Bisi 20 Tuai Bilik (KIR) ari raban seranta di pelilih tu nerima bantu khas ngena baucher RM500 nengah Program Nyua Bantu Inisiatif Perintah MADANI (Sejahtera MADANI) di Opis Pelilih Pakan, kena Hari Satu.

Bantu nengah Skop Ngintu Pengelantang Taun 206 nya diagih dikena mantu penerima besikap ngintu Pengerami Gawai ti deka diintu enda lama da.

Pengawa nyua bantu dipenyadi Penulung Direktor Kanan, Nor Izzah Marzuki ngari ke Pegawai Pemansang Zon (Sri Aman), Opis Pemansang Nengeri Sarawak (Sri Aman).

Ku Izzah, semua penerima ti dipilih nya orang ti berejister dalam sistem eKasih lalu dikelala ba kategori seranta ti begunaka perati lengkas.

Ku iya, tetiap penerima nerima baucher RM500 ti ulih dikena bebeli ke barang diguna nyengkaum nyendia diri ngintu pengerami enggau peminta ruang bilik.

“Bantu tu dikearap ulih ngelempung tating belanja penerima kelebih agi maya napi belanja idup enggau besikap nyerumba Gawai Dayak,” ku iya.

Iya mega madah, atur program nya mandangka penyiru perintah negap agenda ngintu pengelantang rayat ba renggat baruh nipak juluk Malaysia MADANI ti ngemerat pengelantang komuniti. - EDISI UKAS