KUCHING: Pengerami Gawai Dayak terus nyadi lambang penyerakup enggau pengelantang rayat pupu bansa di Sarawak lebuh dirami enggau inklusiviti nengah Pengerami Switching On Gawai Dayak Lighting di Bandaraya Kuching.
Sapit Premier Sarawak, Datuk Amar Profesor Dr Sim Kui Hian madah, atur program baka nya mandangka identiti Sarawak nyadi siti nengeri ti semampai ngenang bemacham budaya enggau pengelantang komuniti.
Ku iya, pengawa ngintu bemacham pengerami besai di Sarawak ti dirami begulai nadai ngira raban bansa enggau pengarap nyadi pengelebih nengeri tu ngetan penyerakup rayat.
“Tu nunjukka Sarawak chukup inklusif,” ku iya lebuh pengerami nya kena Hari Dua.
Datuk Amar Dr Sim mega ngena peluang nya meri Selamat Ngintu Gawai nuju semua rayat Sarawak ti deka ngintu pengerami nya.
Iya mega ngingatka mensia mayuh semampai nyaga pengelikun ba jalai alun sepanjai musin pengerami kelebih agi maya pulai ke menua.
Nangkan nya, Datuk Bandar Kuching Selatan (MBKS), Dato Wee Hong Seng madah, konsep rumah panjai ti semampai nerima temuai maya ngintu Gawai mandangka semangat begulai komuniti Sarawak ngintu bemacham budaya enggau adat asal.
Ku iya, reti begulai enggau pengelantang ti dikemeran rayat Sarawak meseti terus dijaga nyamin penegap sereta pengelantang nengeri.
“Rumah panjai tu lambang rumah ti bendar laban tetiap pintu semampai sedia nerima temuai maya ngintu Gawai.
“Semangat begulai tu nyadi kedap penyerakup rayat Sarawak ngintu pengelantang enggau bemacham budaya,” ku iya.
Iya mega ngelalau rayat Sarawak terus seati lalu begulai ngetan pengelikun, penegap sereta pengelantang ti diasai ke nengeri tu ari sebarang pekara ti ulih ngasuh komuniti pambar.
Ba pekara sama, Dato Wee madah ke rebak biak nya asil ketau pemadu besai Sarawak dudi hari lalu inisiatif perintah nyendia pelajar tinggi pechuma deka nyadi penyungkak besai nempa modal mensia bekualiti.
Iya mega nerang ke langkar tengkebang ias enggau pekayan Gawai ti dikena ba pengawa nya ngira sensitiviti budaya komuniti Dayak nyengkaum minta penemu komuniti bekaul sebedau dikena.
Pengerami nya mega richah enggau pengawa ngidupka lampu pengias besuluka jaku Gawai Dayak nyadi lambang pengerichah ngintu pengerami komuniti Dayak di Sarawak. - EDISI UKAS
