KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai ngerichah Pengawa Makai Selamat Aidiladha diatur Kaunsil Islam Sarawak (MIS) Taun 1447H/2026M ti diatur di Masjid Jamek Negeri Sarawak, Petra Jaya, kena Hari Tiga.

Pengawa dipun enggau pengawa mantaika niat ibadah korban sebedau ngemata pengawa nyayat dua iku jelu korban.

Taun tu, bisi lapan iku chapi korban diberi, bela tiga iku ari MIS enggau lima iku ari Kaunsil Pengelantang enggau Lumba Orang Gawa Perintah Sarawak (MAKSAK).

Udah nya, iya mega bejadi simbolik nyayat dagin korban sebedau nyua pemeri dagin korban ngagai 30 penerima nyengkaum raban asnaf enggau menyadi baru ngelingi Bagi Menua Kuching.

Dulu ari nya, Datuk Patinggi Abang Zohari begulai enggau temuai dipebasa bukai Solat Sunat Aidiladha ti digulu lebih 3,000 raban Islam di Kuching.

Solat nya betuai ke Sapit Imam Besai Sarawak, Mohammad Ihsan Haidzir, seraya khutbah Aidiladha dikenatai Mufti Sarawak, Datu Khalidi Ibrahim.

Bela datai, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Sapit Menteri ba Opis Premier Sarawak (Penyeraris Projek Ungkup Agensi Pemansang Wilayah, DBKU enggau Pekara Islam) Datuk Dr Abdul Rahman Junaidi, Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya, Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Yang Dipertua MIS Datuk Misnu Taha sereta temuai dipebasa bukai. - EDISI UKAS

Pemberita : Ahmad Daniel Faiz
Gambar: Ibanez Jeffery