Pekara nya ditetapka ba Aum Sekretariat Lumba SEA 2027 Bil.1/2026 ti betuai ke Sapit Sekretari Perintah Sarawak (Operasyen) Datu Hii Chang Kee kena Hari Dua.
Nengah Struktur Sekretariat Local Organising Committee (LOC) Kluster Sarawak, Datu Hii deka nyadi Chairman ti deka disaup Sekretari Mendam Opis Menteri Nembiak, Lumba enggau Pemansang Orang Dagang (MYSED) Dzulkornain Masron ti nyadi Sapit Chairman.
Mandal Chairman deka dipegai Nancy Jolhi, Mu’azamir Jili dan Seroji Ludin, seraya Pemangku Tuai Pegawai Eksekutif Kaunsil Lumba Sarawak, Khairul Nizam Morshidi ti nyadi Sekretari.
Struktur LOC Kluster Sarawak mega dibagi ngagai empat bagi menua besai ti bejalaika mayuh pangku pengawa ngemujur Lumba SEA ila.
Strategic, Governance And Communication Unit betuai ke Jenny Lee Siak Ne; Corporate Services And Commercial Affairs Unit betuai ke ke Asmawaty @ Siti Asmah Ahmad, Venue Preparations, Games Operation And Stakeholders Experience Unit betuai ke Abdul Rani Abdullah seraya Puvindra Pubeion Jayakumar ngetuai Digital, Technology And Games Systems Unit.
Maya bejaku ba aum, Datu Hii nyemetak madah ke pengawa numbuh sekretariat beguna amat dikena ngepun pangku pengawa ngagai semua komiti nentuka Lumba SEA 2027 di Sarawak lanchar enggau nitih ke standard antarabansa ti ditetap.
Ba aum nya, sekeda komiti mega nerang ke status pemadu baru besikap kelebih agi ari sukut ngemujur venue pekit.
Ke rikod, Sarawak deka ngatur 17 ari 38 lumba ba Lumba SEA 2027 ti deka diatur ari 18 nyentuk 29 September.
Lumba tu iya nya akuatik, angkat berat, e-sukan, gimnastik, golf, kriket, nimbak, muay, petanque, skuasy, taekwondo, tenis, wushu, bola keranjang, tenpin boling, boling padang enggau nimbak panah laja.
Pia mega, Sarawak mega diberi basa nyadi venue ngepun lumba tebilang nya. - EDISI UKAS
