Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pemanah kaul entara komuniti udah dibantai nengah polisi atur nengeri ti ngemerat prinsip sebela sereta bela bebasa lebuh bantu baka belanja Unit Pekara Pengarap Bukai (UNIFOR) diagih ngagai mayuh rumah sembiang chara sebala.
“Penyelai penyerakup sereta pengelantang ti bisi di Sarawak nentuka bantu baka belanja UNIFOR diagih ngagai semua pengarap nadai ngira tirai juru.
“Semua tu ulih dipeda kitai semina di Sarawak aja. Nadai endur bukai.
“Taja tuai kitai bebida pengarap ari kita, tang iya tetap mendingka peminta rayat nengah tuai komuniti,” ku iya.
Iya madah munyi nya ba Pengawa Merekat ‘Holy Spirit Chapel’ Kampung Rituh Labuan enggau Mawang, ditu empai lama.
Nangkan nya, Chairman ‘Holy Spirit Chapel’ Kampung Rituh Labuan enggau Mawang, SD Laum Rikes ba pengawa nya mega madah, pengawa ngaga gerija nya belabuh ari taun 2014 nengah peminta ngagai pengari rayat dia lebuh nya sebedau pengawa nya dipun ba taun 2018 ngena pupu ti digumpul.
Ku iya, pengawa ngaga chapel nya disukung nengah mayuh belanja nyengkaum belanja tumu sepenyampau RM370,000, bantu UNIFOR ba taun 2020 sepenyampau RM200,000 sereta belanja tambah RM100,000 ba taun siti.
Iya mega nerang ke ba taun 2024, peminta nengah Program Transfomasyen Menua Pesisir (RTP) udah dikemendar sepenyampau RM200,000, kelimpah belanja tambah RM70,000 ari UNIFOR dikena ngenap pengawa ngaga rumah sembiang sereta fasiliti bukai.
Nya kebuah, semua ungkus ngaga chapel nya manggai RM940,000 asil sukung Perintah Sarawak nengah mayuh bantu nyengkaum ari UNIFOR. - EDISI UKAS
