LIMBANG: Sektor betanam betupi nyadi sebagi ari penyungkak besai ti meransang pemansang inklusif ungkup penyebela ekonomi menua pesisir kelebih agi ba endur ti benung deras mansang.
Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail madah, bemacham inisiatif benung enggau deka dipejalai dikena nambah pengelebih sektor betanam betupi di Limbang, nyengkaum nyendia infrastruktur nginjin ti berurun agi.
“Aku endang naka ulih nentuka sektor betanam betupi di Limbang tu ditambah ke alai kitai bisi siti kilang ti udah tembu iya nya palan ngumpul, nginjin enggau nungkus di Kubong.
“Tang diatu, kitai agi nganti meli mesin ti deka dikena nginjin asil utai tanam lalu ba renggat keterubah meri perati ngagai pengawa nanam chabi, dientudi limau kasturi, nangka madu enggau mega rian,” ku iya lebuh Program Mantar Gawai 2026, ditu empai lama.
Iya ti mega Kaban Kunsil Nengeri (ADUN) Bukit Kota mega madah, pemansang sektor betanam betupi nya deka dipejalai lalu ngira peminta perengkaguna pemun ba menua pesisir.
“Aku deka naka ulih nambah sektor betanam betupi di Limbang kelimpah ari perengkaguna pemun ba genturung pendiau. Ba DUN Bukit Kota aja, bisi urung 60 genturung pendiau enggau mega rumah panjai,” terang iya.
Ba pekara bukai, iya mega nerang ke agih belanja pemansang ti diagih ngagai tetiap Kaban Kunsil Nengeri (ADUN) Gabungan Parti Sarawak (GPS) ninting taun dikena negap pemansang menua pesisir kelebih agi ba genturung pendiau enggau rumah panjai.
“Ari penyampau nya, RM5 juta diagih ungkup Program Transfomasyen Menua Pesisir (RTP) dikena ngagai balai enggau mega bejalaika mayuh projek baka jalai semin ari rumah ke rumah,” ku iya agi. - EDISI UKAS
