Bantu UNIFOR Mai Pemansang Nyentuk Ulu Ba Ajeng, Nunjukka Nadai Siku Rayat Dikelaung
MIRI: Pengeran Perintah Sarawak nentuka pemansang enggau pengelantang rayat diasai ke chara inklusif majak nyata dipeda lebuh bantu Unit Pekara Pengarap Bukai (UNIFOR) mujur datai ba menua ulu Ba Ajeng, Ulu Baram nengah pengawa nirika Gerija BEM Ba Ajeng.
Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, bantu nya mandangka perintah enda kala nejuka komuniti Penan taja diau ba jauh ba menua entigis ti mar dilawa.
“Gerija tu mega entara penerima tumu geran UNIFOR urung taun 2018 enggau 2019 nengah agih belanja sepenyampau RM85,000 ungkup tuju nirika rumah sembiang nya,” ku iya.
Iya madah munyi nya lebuh bejadi Begunan Gerija BEM Ba Ajeng di Long Ajeng, Ulu Baram kena Hari Empat.
Dikena datai ba endur nya begunaka timpuh pejalai urung tujuh jam ngena entukar 4WD(4x4) ari Miri ke Segah Selaan sebedau nampung pejalai ngena bot pengelama sejam setengah.
Ku Datuk Gerawat, kelimpah ngaga gerija, peranak mega nerima bantu ari Opis Kampung iya nya 1,580 kepin atap spandek ungkup komuniti dia.
Iya ti mega Kaban Kunsil Nengeri (ADUN) Mulu madah, kenyau ari taun 2017, Perintah Sarawak udah ngagihka belanja RM650 juta kepada UNIFOR dikena mantu ruang sembiang pengarap ukai Islam di selampur nengeri.
“Ba taun 2026 aja, sepenyampau RM120 juta diagih mungkur RM90 juta ungkup rumah sembiang enggau RM30 juta ungkup sekula mission.
“Komuniti Penan enggau peranak menua ulu mega nerima bantu baka RM1,000 ungkup tetiap anak mit baru ada, bantu indai baru beranak sereta Bantu Barang Diguna Pemun Sarawak (SKAS),” ku iya.
Ba pengawa nya, iya mega ngemendar agih belanja Program Transfomasyen Menua Pesisir (MRP) sepenyampau RM10,000 ngagai Komiti Pemansang enggau Pengelikun Genturung Pendiau (JKKK) Long Ajeng enggu RM2,000 dikena meli bangku Gerija BEM Long Ajeng.
Bisi mega dikemendar agih belanja RM8,000 bela ungkup JKKK Long Murung enggau JKKK Long Lamam.
Bela datai, Sekretari Politik Premier Sarawak, Dominic Nyurang Ajang, Chairman BEM Pelilih Hulu Baram Pastor Christopher Ega, Tuai Kampung Ba Ajeng Rolend Luhat, Tuai Kampung Long Murung Nelson Simun, Pastor Paul Dison sereta Tuai Sidang Damus Avun.- EDISI UKAS
