KUCHING: Pengerami Gawai Dayak ukai semina nyadi pelasar betemu baru enggau diri sebilik sereta ngambat pemulai anak ke rumah panjai, tang mega nyadi pugu negap penempa bansa Sarawak ti bepuguka penyerakup, penegap enggau pengelantang.
Sapit Premier Sarawak, Datuk Amar Profesor Dr Sim Kui Hian madah, pengerami nya lambang pengaya budaya enggau tradisyen komuniti Dayak ti ngerami asil ketau seraya mekuh semangat begulai entara rayat pupu bansa ba nengeri tu.
Ku iya, Gawai Dayak meg nyadi pelasar ngempung semua anak Sarawak nadai ngira tirai juru ngambi bela bebasa, berandau enggau ngerami pengelain budaya ti nyadi pengering nengeri tu.
“Gawai Dayak ukai semina peluang diri sebilik betemu tauka pulai ke rumah panjai.
“Tu mega pengerami budaya ti ngerami asil ketau seraya ngempung anak Sarawak ngambi begulai ngerapit kaul bela bebasa enggau ngerami hari besai tu nyadi siti ruang bilik besai Sarawak.
”Tu mih chunto pemadu manah nempa bansa Sarawak ti meseti terus ditegap laban penyerakup nya pugu penegap lalu penegap nyadi penyungkak pengelantang,” ku iya nengah pesan Pengerami Gawai Dayak 2026.
Ku iya, pemujur Sarawak ti diasai ke diatu nentuka nengeri nya nyadi chunto ngagai mayuh rayat tang majak dibasa dibanding 100 taun ti udah.
Ku iya, ubah positif ti nyadi asil langgur pemansang enggau penegap politik udah ngangkatka Sarawak nyadi siti nengeri ti majak dibasa enggau dikemegah rayat.
Berebak enggau nya, iya minta anak Sarawak ba menua bukai sama bekunsi penemu, penau enggau pengeransing nampung agenda nempa bansa sereta pemansang nengeri.
“Maya pulai ke Sarawak, peda kediri ubah ti udah nyadi lalu perunding baka ni kita ulih mangku pengawa nyaup nentuka Sarawak maju agi dudi hari,” terang iya.
