KUCHING: Pengawa besikap ngatur Pengerami Nerima Pengabang Gawai Dayak 2026 ti deka diatur kena Hari Satu, 1 June 2026 di Kompleks Unit Pekara Pengarap Bukai (UNIFOR), Kuching diatu ba renggat kepenudi nengah raptai penuh diatur nentuka pengerami nya lanchar.
Sapit Premier Sarawak, Datuk Amar Douglas Uggah Embas mega datai ngabas pengawa besikap sereta atur raptai nya nyengkaum bemacham tusun pengawa enggau sukut logistik dikena ngambat penatai bala temuai.
Tinjau nya nentuka semua perambu lanchar nitih taga kelimpah meri peluang ngagai komiti pengatur ngadu pengawa nyeraris kepenudi sebedau hari nyadi.
Sepanjai raptai nya, bemacham pemerindang main asal enggau atur pengawa rasmi diuji nentuka pejalai program ti mega entara aktiviti besai ngintu Pengerami Gawai Dayak di Sarawak lanchar.
Bela datai meda raptai iya nya raban Unit Protokol, Istiadat enggau Atur Pengawa Sarawak (UPPAN) begulai enggau agensi bekaul ti begulai nyeraris enggau ngatur pengerami.
Pengerami Nerima Pengabang Gawai Dayak 2026 sedia ngambat penatai mensia mayuh belabuh ari pukul 9 pagi lalu disadang nerima penatai pengusung ngambi begulai ngintu pengerami nya enggau lantang sereta richah.
Pengerami nya mega richah nengah penatai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta Sapit Menteri Besai, Datuk Amar Fadillah Yusof begulai enggau bala tuai perintah nengeri.
Pengerami nerima pengabang nya disadang nyadi pelasar negutka agi kaul penyerakup, bebaik enggau semangat begulai entara rayat pupu bansa di Sarawak nipak semangat Gawai Dayak ti dirami ninting taun. - EDISI UKAS
Pemberita : Ezzah Syafiqah
Gambar : Ezzah Syafiqah
