MIRI: Perintah Sarawak naka ulih negap pemansang menua ulu nengah pengawa ngempu enggau nyeruri jalai batang lama ba selampur nengeri nyengkaum ba Ulu Baram.

Sapit Menteri ba Opis Premier Sarawak (Pengereja Kasar, Imigresyen enggau Patau Projek) Datuk Gerawat Gala madah, inisiatif nya nentuka mayuh agi belanja diagih dikena nambah rentayan menua pesisir berenggat ke pemaik rayat.

Ku iya, inisiatif nya nipak juluk Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg negap pemansang menua pesisir.

“Pemansang tu ukai semina nyendia infrastruktur tang mega nyerangkung perengkaguna pemun, pelajar, pengerai sereta peluang ekonomi dikena nambah pengelantang rayat,” ku iya.

Iya madah munyi nya ba Pengawa Bejadi Rumah Panjai Blok Baru Uma Pawe di Long Apu, Baram, kena Hari Enam.

Long Apu penyauh urung 240 kilometer ari Miri lalu begunaka timpuh entara enam nyentuk tujuh jam pejalai ngena entukar 4QD ti mega entara menua ulu ti agi bepanggai ba jalai batang lama nyadi akses.

Nangkan nya, Datuk Gerawat ti mega Kaban Kunsil Nengeri (ADUN) Mulu mega meri terima kasih ngagai komiti pengatur ti diulu ke Anthony Lawai Lutang sereta Tuai Raban Bansa Peter Kebing Tingang pemujur nembuka pengawa ngentak blok baru rumah panjai nya.

Ku iya, pengawa bejadi blok baru nya entara hari besejarah ti mandangka pemansang, penyerakup enggau pengeransing komuniti Kenyah Uma Pawe ngemansang komuniti sida.

“Nengah penambah 123 pintu baru, Uma Pawe diatu bisi 193 pintu rumah panjai ti ngundan urung 1,000 peranak ngujungka nya entara rumah panjai pemadu besai ba Baram.

“Pemujur tu bukti peneguh tuai sereta kerejasama rat semua komuniti nempa pemansang ti menyana agi ungkup rebak dudi,” ku iya.

Kelai sukung ngagai pemansang komuniti menua, iya mega ngemendar agih belanja Projek Mit Pemansang Menua Pesisir (MRP) sepenyampau RM20,000 ngagai Komiti Pemansang enggau Pengelikun Genturung Pendiau (JKKK) Long Apu.

Bela datai, Kaban Parlimen Baram Dato Anyi Ngau, ADUN Telang Usan Dato Dennis Ngau sereta Sekretari Politik Premier Sarawak Dominic Nyurang Ajang. - EDISI UKAS