PUTRAJAYA: Perintah Sarawak nerima manah pengawa Perintah Besai deka nyerungkai model pemansang padang bilun chara desentralisasyen ba randau bekaul perambu Padang Bilun Antarabansa Kuching Baru (NKIA).
Menteri Pengangkut Sarawak, Dato Sri Lee Kim Shin madah, pekara nya entara asil penemuai basa iya ngagai Menteri Pengangkut Malaysia, Anthony Loke Siew Fook di Putrajaya kena 26 Mei tu tadi.
Ku iya, inisiatif desentralisasyen ti benung diperunding ungkup NKIA mandangka model pemansang ti kolaboratif agi enggau meri pangku pengawa besai agi ngagai Perintah Sarawak ba perambu enggau pejalai projek sambil nyukung juluk penerebai enggau ekonomi timpuh panjai Sarawak.
Ku iya, perintah nengeri keran negap infrastruktur penerebai rantau tu dikena nyukung pemansang ekonomi dudi hari enggau peminta penumpang ti majak nambah.
“NKIA ti dilanggur nya sebagi ari visyen timpuh panjai Sarawak dikena negap penuduk kami nyadi hab penerebai serantau enggau nambah penyambung ungkup pejalai penumpang enggau kargo,” ku iya.
Dato Sri Lee madah, aum nya mega berandauka sekeda pekara strategik bekaul pengangkut di Sarawak nyengkaum pemansang sektor pengangkut, rentayan langit domestik, infrastruktur rel sereta isu logistik.
Iya mega madah, randau nya meri peluang berandauka rega tambang bilun di Sarawak ti niki ke alai iya merambu ngidupka baru penerebai Kuching–Sibu, Kuching–Bintulu enggau Kuching–Miri nengah langgur kereja Obligasyen Servis Langit Menua Pesisir (PSO).
Ku iya, perambu nya ulih nambah penyambung sereta ngelempung belanja pejalai rayat Sarawak.
Bisi mega dikerandau iya nya pematut bejalaika mekanisme tatak tambang bilun ungkup penerebai bekaul lalu Anthony Loke merambu AirBorneo berundingka operasyen komersial ungkup penerebai nya ngena bilun ATR72 ti bisi diatu.
Pia mega, randau nya bisi nyebut pemansang pemadu baru AirBorneo, projek pejalai kerita api Bintulu-Samalaju nengah inisiatif besai agi Trans-Borneo Railway, isu Kereban Tatak Pengelaju (SLD) ungkup entukar komersial sereta Atur Nyekat Pemerat (WRO) ngaul entukar berat ba Jalai Besai Pan Borneo.
Nangkan nya, Dato Sri Lee madah ke penerebai tambah entara Miri enggau Bario udah dikemendar serimbai Pengerami NUKENEN ti deka diatur bulan Julai 2026 dikena nangkup peminta pejalai nambah sepanjai festival nya.
Kededua menteri mega besilih penemu bekaul sekeda inisiatif pengangkut ti ngaul kerejasama entara Perintah Besai enggau Perintah Sarawak.
Ku Dato Sri Lee baru, randau nya mandangka kaul kerejasama rat entara Opis Menteri Pengangkut Malaysia enggau MOTS mutar isu pengangkut sereta nambah penyambung ke pemaik rayat.
Bela datai ba penemuai basa iya nya Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Sekretari Mendam MOTS Datu Wong Hee Sieng, Tuai Unit Pengangkut Darat enggau Logistik Chong Chi Fam sereta Tuai Unit Penerebai Dayang Nurhayati Abang Ahmad. - EDISI UKAS
