Projek Parit Enggau Entali Ai Di Spaoh Meseti Dirumban
SPAOH: Perintah Sarawak deka pemaik projek parit enggau entali ai ti benung dipejalai ba Spaoh ulih diasai ke rayat lengkas dikena nyukung pemansang sektor betanam betupi serta nambah tikas sosioekonomi peranak menua.
Sapit Premier Sarawak, Datuk Amar Douglas Uggah Embas madah, pejalai projek nya meseti dirumban berindik ari nya bisi empas besai ngagai pengelantang komuniti menua pesisir kelebih agi raban pekebun mit dia.
Iya madah munyi nya lebuh ngulu randau bekaul pejalai enggau perambu projek pemansang infrastruktur parit enggau entali ai di Rest House Spaoh kena Hari Lima.
Ba sesyen nya, Opis Parit enggau Entali Ai (JPS) Bagi Menua Betong ti betuai ke Injinir Bagi Menua, Mazolizam Mohamad begulai enggau Penulung Injinir Bagi Menua, Nash Hafizi Awg Sarbini udah nerang ke status pejalai sekeda projek besai di Spaoh enggau Betong.
Entara projek ti dikerandau iya nya Projek Infrastruktur Parit enggau Entali Ai (D&I) Baru Skim Tanjung Tisak sereta selapat tebing sungai di Pamutang, Spaoh ti dikemendar kena 5 Januari 2026 nengah ungkus kontrak RM8.8 juta dlalu dipejalai ba timpuh 18 bulan.
Projek ti diatu ba renggat digaga nya ditaga ulih nambah pemanah enggau pengelanchar sistem parit sereta nyukung aktiviti betanam betupi peranak menua.
Bisi mega dibantai iya nya Projek Infrastruktur Parit enggau Entali Ai (D&I) Baru Skim Batang Layar Blok D di Bagi Menua Betong ti dikemendar kena 10 Mac 2025 nengah ungkus kontrak RM29 juta lalu digaga ba timpuh 18 bulan.
Bekaul projek nya, Datuk Amar Douglas Uggah ti mega Menteri Infrastruktur enggau Pemansang Penyangkai Kapal merambu raban JPS berundingka pengawa ngelempai kompartmen projek berenggat lalu enda ibuh nganti projek tembu.
Ku iya, chara nya deka nentuka pemaik projek diasai ke penguna tumu agi seraya nyaup meransang aktiviti ekonomi menua.
Kelimpah ari nya, iya mega bisi berandau enggau Pegawai Menguasa Pelilih Mit Spaoh, Denny Lim enggau Sekretari Kaunsil Pelilih Betong, Lister Clement bekaul sekeda perambu projek pemansang ti dilanggur ungkup Spaoh dudi hari. - EDISI UKAS
