BETONG: Pengerami Gawai Mangkung Tiang di Rumah Panjai Penurin ukai semina lambang beterima kasih pengudah penembu ngentak rumah panjai baru, tang mega nyadi lambang semangat beserakup enggau kerejasama komuniti ngemansang komuniti ti idup lantang.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar Datuk Gerald Rentap Jabu madah, pengerami nya nyadi lambang pemujur peranak menua begulai nempa siti komuniti ti seati sereta ngembuan tuai ti entap ba renggat rumah panjai.

Iya madah munyi nya lebuh ngulu Pengerami Gawai Mangkung Tiang di Rumah Sibat Banyan, Penurin kena Hari Lima.

Ku iya, semangat begulai ti dipandang peranak menua sepanjai pengerami nya diatur bukti rega penyerakup agi entap dikemeran komuniti Iban.

Datuk Gerald mega berasai gaga meda sambut bala peranak sereta penatai temuai ari mayuh endur ti pulai begulai ngerami pengerami nya.

Ku iya, pemulai bala anak ti gawa jauh di mengeri bukai serimbai musin pengerami mega nunjukka sida agi ngenang penatai asal enggau terus ngetan kaul diri sebilik sereta semangat begulai ti agi nyadi tiang penyerakup komuniti Iban.

Berebak enggau nya, iya ngarap semangat ‘segulai sejalai’ terus ditegap entara komuniti dikena ngerapit kaul enggau pengelantang komuniti, kelebih agi serimbai Pengerami Gawai Dayak ti deka diintu.

Nambah ke nya, iya mega ngingatka mensia mayuh semampai ngemerat sukung pengelikun diri enggau ruang bilik sepanjai musin pengerami.

Nangkan nya, Kaban Parlimen Betong Dato Dr Richard Rapu madah ke Pengerami Gawai Mangkung Tiang nyadi pelasar beguna nyaga pesaka budaya sereta mekuh identiti komuniti Iban.

Iya mega meri terima kasih ngagai Tuai Rumah Sibat Banyan enggau semua peranak Rumah Panjai Penurin ke pemujur ngentak rumah panjai baru ti nyadi asil kerejasama enggau pengeransing komuniti menua.

Ku iya, rebak biak meseti terus dibai enggau diterang bekaul adat enggau budaya asal nentuka pesaka komuniti Iban ulih dijaga sereta ditampung ngagai rebak dudi.

Pengawa nya mega digulu urung 800 pengusung nyengkaum peranak ari empat rumah panjai besemak baka Rumah Saka, Rumah Maja, Rumah Remabong enggau Rumah Entanak ti ngerichah pengerami nya.

Bela datai, bini Datuk Gerald, Datin Rosemarie Wong, Pegawai UKAS Bagi Menua Betong Tony Malang Chabu, Pemancha Komuniti Iban Pelilih Betong Norman Ngumbang, Penghulu Sebastian Randy, Penghulu Ajang Tibu, Kaunselor Tebari Megong sereta Kaunselor Jantie Miai. - EDISI UKAS