KUCHING: Pemberita mangku pengawa nyadi tiang ti beguna nentuka mensia mayuh nerima penerang ti betul, engkeman enggau bisi tanggungpengawa kelebih agi ba jeman media rama ti ngemata berita dikerembai deras.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, taja sapa-sapa aja diatu ulih bekunsi penerang nengah bemacham pelasar digital, tang raban pemberita tetap mangku pengawa besai mresa penerang sereta ngenuku penerang nya ari raban ti bekaul.

Ku iya, peneras penerang ti dikerembai ukai nyamin pemendar enggau pengamat.

“Ba jeman media rama diatu, sapa-sapa aja ulih bekunsi penerang. Berita, gambar enggau video ulih dikerembai ke serata dunya semina berapa sikin aja.

“Tang, peneras ngerembai penerang enda nyamin pemendar enggau pengamat. Ditu mih reti pemberita ti bendar,” ku iya nengah pesan serimbai Hari Pemberita Nasional (HAWANA) kena Hari Lima.

Ku iya, mensia mayuh agi begunaka pemberita dikena mantis penerang ti ulih dipechaya lebuh media rama nyau dibalut dawa, peragam enggau penerang ti apin ditemu pengamat.

Iya madah baru, pemberita ti bisi etika mega mangku pengawa nagang berita bula, petenah enggau penerang ti diubah ti ulih ngeruga pengelantang komuniti.

Nambah ke nya, ku iya, pemberita mega nyadi jematan entara rayat enggau raban bekaul nengah mai sada komuniti ngagai penempa polisi kelimpah nyaup nerang ke polisi sereta inisiatif perintah ngagai rayat.

"Prinsip pemberita deka terus relevan taja teknologi enggau pelasar komunikasyen berubah seagi mensia mayuh begunaka pemendar, pengelurus enggau akauntabiliti," ku iya nyemetak.

Nya kebuah, Datuk Abdullah ngelalau semua raban terus ngetan lebas media ti bisi tanggungpengawa enggau negap inteegriti nyadi pemberita.

Iya mega meri terima kasih ngagai semua raban media ti udah bebendar ngenatai penerang ngagai mensia mayuh. - EDISI UKAS