SEBUYAU: Bisi 50 penerima ari 22 genturung pendiau Iban di Sebuyau nerima bantu pemakai enggau pemeri nengah Program Tuai Ngundang Rayat sereta Tanggungpengawa Rama Korporat (CSR) diatur SACOFA.

Menteri Utiliti enggau Telekomunikasyen Sarawak ti mega Kaban Kunsil Nengeri (ADUN) Sebuyau, Dato Sri Julaihi Narawi madah, program baka nya ukai semina nyaup ngelempung tating belanja penerima, tang mega ngerapit kaul entara tuai, agensi enggau mensia mayuh.

Berebak enggau nya, iya mega meri terima kasih ngagai SACOFA ke pengeran ngatur program CSR ungkup pengelantang komuniti menua pesisir kelebih agi ba Sebuyau.

Iya madah munyi nya ba pengerami nya di Kampung Bulan, ditu kena Hari Lima.

Bantu nya diagih dikena nyaup raban ti begunaka bantu serimbai Pengerami Gawai Dayak.

Nangkan nya ba program sebaka di Kampung Lubok Manta Sebangan, Dato Sri Julaihi ngemendar agih belanja RM100,000 dikena nyeruri balai raya dikena nambah pengelantang peranak genturung pendiau dia.

Ku iya, pengawa baka nya mandangka pengeran perintah begulai enggau agensi bekaul nyaga pengelantang rayat menua pesisir sereta nyamin pengelantang komuniti.

Di Kampung Lubok Manta, bisi 50 penerima ari 12 genturung pendiau komuniti Iban di Sebangan mega nerima bantu pemakai ari SACOFA.

Bela datai, Tuai Pegawai Eksekutif SACOFA Jafer Sadiq Abdul Lhatif enggau Pemangku Pegawai Pelilih Sebuyau Lois Andria Barieng. - EDISI UKAS