KUCHING: Semangat penyerakup, pengelantang enggau bela bebasa entara orang gawa perintah ari pupu bansa enggau tirai juru terus nyadi pugu pengering Servis Perintah Sarawak dikena ngenatai servis pemadu manah ngagai rayat.

Sekretari Perintah Sarawak, Datuk Amar Mohamad Abu Bakar Marzuki madah, Pengerami Gawai Dayak nya nyadi pelasar besai mereti ke reti beserakup ti nyadi pugu pemujur Servis Perintah Sarawak.

“Kitai ba Servis Perintah Sarawak mega ari pupu bansa, pengarap enggau tirai juru.

“Nya kebuah, Pengerami Gawai Dayak tu nyadi pelasar besai mereti ke pugu pengering orang gawa perintah bepanggai ba semangat seati, lantang nggau bela bebasa ke pangan diri,” ku iya nengah pesan Pengerami Gawai Dayak 2026.

Datuk Amar Mohamad Abu Bakar madah baru, penyerakup dalam Servis Perintah Sarawak udah nempa siti institusyen ti tegap lalu ulih mansang nyadi siti tim dikena meri servis pemadu manah ngagai rayat sereta ngemujur mayuh inisiatif pemansang Perintah Sarawak.

Nambah ke nya, ku iya, sulu jaku Pengerami Gawai Dayak taun tu, Segulai Sejalai Nuju Pemansang relevan endar napi pemar kemaya hari ti majak kompleks, kelebih agi ba jeman teknologi digital ti deras mansang.

Ku iya, pengelantang enggau penyerakup ti diasai ke rayat Sarawak meseti terus dijaga nentuka nengeri tu meruan likun, lantang enggau tegap. - EDISI UKAS