SEOUL: Pengereja landik ba bidang teknologi, pansik, injiniring, inovasyen enggau dagang beguna amat dikena nyukung pemansang industri dudi hari sereta nambah semekih Sarawak ba renggat global.

Sapit Premier Sarawak, Datuk Amar Awang Tengah Ali Hasan madah, peminta ngagai pengereja landik deka terus nambah nipak inisiatif perintah nengeri ngerumban transfomasyen ekonomi nengah Strategi Pemansang Pengudah COVID-19 (PCDS) 2030.

Ku iya, Sarawak diatu benung ngemansang bemacham industri berega nyengkaum kuasa gadung, teknologi digital, aerosingka miga, teknologi moden, infrastruktur pintar enggau industri semikonduktor.

“Ba taun dudi, Sarawak deka terus begunaka mayuh agi injinia, saintis, pemansik, pakar teknologi, pedagang enggau inovator dikena nyukung ekosistem teknologi tinggi ti majak nambah.

“Seraris enggau Sarawak nyingkang nuju industri pemadu maju enggau teknologi dudi hari, peluang ti disedia ba menua deka terus nambah,” ku iya.

Iya madah munyi nya ba randau begulai enggau Gerempung Nembiak Malaysia Korea (PPMK) ti diatur SMD Semiconductor di Seoul, Korea Selatan kena Hari Minggu.

Datuk Amar Awang Tengah ti mega Menteri Dagang Antarabansa, Industri enggau Pengawa Meranak Puku (MINTRED) Sarawak madah, Perintah Sarawak semampai ngenang pemesai guna nembiak ti nampung pelajar ba menua luar lalu sida nya aset beguna ba pemansang nengeri.

Ku iya, peneleba ti diulih ba menua maju baka Korea Selatan ulih nyaup nempa modal mensia bekualiti ti diguna dikena nyukung agenda pemansang Sarawak dudi hari.

Iya mega minta nembiak Malaysia kelebih agi anak Sarawak ngena manah peluang nambah penemu enggau peneleba ba Korea Selatan sebedau pulai baru gawa ke pemansang nengeri.

Bela datai, Sapit Menteri MINTRED Sarawak Datuk Dr Malcolm Mussen Lamoh, Duta Besai Malaysia ke Republik Korea Dato' Mohd Zamruni Khalid, Tuai Pegawai Eksekutif (CEO) SMD Semiconductor Shariman Jamil sereta Chairman OCI Holdings enggau OCI TerraSus, Woo Hyun Lee. - EDISI UKAS