Korea Selatan Bakih Strategik Beguna Ba Pemansang Ekonomi Sarawak
SEOUL: Korea Selatan terus nyadi entara bakih strategik pemadu beguna Sarawak ba bemacham sektor nyengkaum dagang, pengawa meranak puku, teknologi, kuasa, kilang enggau pemansang penau.
Sapit Premier Sarawak, Datuk Amar Awang Tengah Ali Hasan madah, kaul rat ti ditanggam entara kededua raban udah nempa mayuh peluang ekonomi, industri enggau pemansang modal mensia ti meri pemaik ngagai rayat Sarawak.
“Pengelama berapa taun ti udah, Sarawak enggau Korea udah nanggam kaul rat ukai semina ba renggat perintah tang mega nengah kerejasama dagang ti entap.
“Kerejasama tu terus mansang ngilah dagang, pengawa meranak puku, teknologi, kuasa, kilang enggau pemansang penau,” ku iya.
Iya madah munyi nya lebuh ngatur randau begulai enggau Gerempung Nembiak Malaysia Korea (PPMK) ti diatur SMD Semiconductor di Seoul, Korea Selatan kena Hari Minggu.
Datuk Amar Awang Tengah madah, asil dagang entara Malaysia enggau Korea Selatan manggai RM27.4 bilion ba taun 2025, seraya dagang entara Sarawak enggau Korea Selatan aja berega RM16.8 bilion.
Menteri Dagang Antarabansa, Industri enggau Pengawa Meranak Puku (MINTRED) Sarawak nya madah, penyampau nya mandangka pengandal kompeni Korea Selatan ngagai Sarawak nyadi palan meranak puku strategik di rantau tu.
Iya mega nerang ke pengawa meranak puku kompeni Korea udah nyendia beribu peluang gawa ba nengeri tu kelebih agi ba Taman Perindustrian Samalaju.
Ku iya, bisi 9,157 peluang gawa udah ditumbuh dia ke alai 83 peratus ari nya dipenggi pengereja pengawa menua.
Bela datai, Sapit Menteri MINTRED Sarawak Datuk Dr Malcolm Mussen Lamoh, Duta Besai Malaysia ke Republik Korea Dato' Mohd Zamruni Khalid, Tuai Pegawai Eksekutif (CEO) SMD Semiconductor Shariman Jamil sereta Chairman OCI Holdings enggau OCI TerraSus, Woo Hyun Lee. - EDISI UKAS
