SEOUL: Sarawak terus ngentapka penuduk nyadi hab teknologi tinggi enggau semikonduktor serantau nengah randau strategik begulai enggau Gerempung Industri Semikonduktor Korea (KSIA) ti dipejalai SMD Semiconductor di Seoul kena Hari Satu.

Randau nya diulu ke Sapit Premier Sarawak, Datuk Amar Awang Tengah Ali Hasan begulai enggau deligit Sarawak nyengkaum ari pengari Opis Menteri Dagang Antarabansa, Industri enggau Pengawa Meranak Puku (MINTRED) Sarawak, Opis Menteri Pengeraja Asal enggau Pemansang Mengeri (MUDeNR), Sarawak Energy Berhad (SEB), InvestSarawak, SAINS enggau RECODA.

Program nya mega disukung Opis Kaunsil Pemansang Meranak Puku Malaysia (MIDA) di Seoul ti ngesan pangku pengawa nyeraris randau enggau pemekuh besai industri semikonduktor Korea Selatan, kelimpah disaup MATRADE Korea dikena nyempil kaul dagang entara Sarawak enggau Republik Korea.

Maya bejaku, Datuk Amar Awang Tengah madah, Sarawak diatu ransing nanggam kerejasama antarabansa dikena ngerumban pemansang teknologi, matak pengawa meranak puku bisi kualiti sereta nambah kerejasama nengeri ba rentayan semikonduktor global.

“Sarawak benung nuju transformatif dikena ngentapka diri nyadi hab teknologi serantau ti benung nyadi.

“Diatu kami meri perati ukai semina matak pengawa meranak puku, tang mega ngagai pemansang ekosistem, penau, kerejasama teknologi enggau pemeruan industri timpuh panjai,” ku iya.

Datuk Amar Awang Tengah mega madah, randau begulai enggau KSIA nya sebagi ari strategi Sarawak dikena nyempil kaul entara ekosistem semikonduktor tebilang dunya sereta nyerungkai peluang kerejasama ba bidang teknologi dudi hari.

Ku iya, entara bidang ti dikelala nyengkaum atur kuasa, Sistem Nyimpan Kuasa Bateri (BESS), infrastruktur AI, teknologi computering pemadu maju nyengkaum ekosistem NPU enggau GPU, kelimpah teknologi satelit enggau orbit baruh bumi (LEO)

Nangkan nya, Tuai Pegawai Eksekutif (CEO) SMD Semiconductor, Shariman Jamil madah, kompeni nya diatu nyingkang ngagai renggat kedua tunga kuing nya pengudah mujur nempa pugu pemansang ekosistem semikonduktor nengeri.

Ku iya, kitai diatu meri perati ngagai pengawa bejalaika projek, ngerembai ekosistem sereta kerejasama strategik begulai enggau pemekuh industri antarabansa.

“SMD Semiconductor diatu nyingkang ngagai renggat bukai. Pugu pemansang enggau pemujur tumu udah nyata dipeda lalu ngemerat nentuka pejalai pengawa ti nemban sereta nempa empas ti ulih disukat ngagai industri,” terang iya.

Nambah ke nya, Direktor Eksekutif Unit Sukung Industri KSIA, Jeon Jae-min nerima manah kerejasama nya lalu madah ke nya inisiatif beguna mekuh kaul entara industri semikonduktor Korea Selatan enggau Sarawak.

Ku iya, kerejasama antarabansa ti meruan ulih nyendia mayuh agi peluang besilih penemu, pemansang penau enggau kerejasama strategik dudi hari. - EDISI UKAS