Ngabang Gawai Nyempil Kaul Tuai Enggau Rayat Di Sarikei
SARIKEI: Program Ngabang Gawai Dayak 2026 ti diatur ba sekeda rumah panjai di Sarikei enggau Meradong nyadi pelasar beguna nyempil kaul entara tuai enggau komuniti menua.
Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei enggau Kaban Kunsil Nengeri (ADUN) Repok, Dato’ Sri Huang Tiong Sii madah, program nya ukai semina ngerami Gawai Dayak, tang mega nyadi pelasar mending kediri penemu, peminta enggau juluk rayat ba renggat baruh.
Ku iya, pengawa ngabang serimbai Gawai Dayak nyadi tradisyen ti nyempil kaul entara tuai enggau komuniti nengah semangat beserakup.
“Tu nyadi pelasar nyempil kaul entara tuai enggau komuniti nengah pengerichah Gawai Dayak,” ku iya lebuh ngulu program nya.
Nambah ke nya, iya mega meri terima kasih ngagai peranak rumah panjai enggau komuniti pupu bansa ke sukung sepanjai Pengawa Bepilih Besai (PRU) enggau Pengawa Bepilih Nengeri (PRN).
Ku iya, sukung nya meransang iya majak mai sada rayat sereta negika peminta komuniti ba renggat Parlimen enggau Kunsil Nengeri nentuka pemansang ti besai agi ulih dipejalai.
“Sukung tu meransang aku majak mantaika isu enggau peminta rayat ba renggat Parlimen enggau Kunsil Nengeri nentuka pemansang ulih diasai ke rayat,” terang iya.
Iya mega meri terima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti terus ngemudi perintah Gabungan Parti Sarawak (GPS) nentuka penegap politik enggau pemansang ekonomi nengeri.
Ku iya, bemacham inisiatif pemansang enggau bantu rayat terus dipejalai nyengkaum ba kandang menua pesisir enggau rumah panjai nentuka pemaik pemansang ulih diasai ke semua.
Program Ngabang Gawai kena Hari Minggu nuju empat rumah panjai iya nya Rumah Kinchu Ajan, Rumah Pitre Ambit, Rumah Clement Asuh enggau Rumah Anthony Suding.
Ngujungka penemuai, Dato’ Sri Huang madah, Pengerami Gawai Dayak ukai semina mandangka pengaya budaya komuniti Dayak, tang mega nyadi pelasar beguna narak penyerakup, pengelantang enggau semangat begulai entara rayat pupu bansa di Sarawak. - EDISI UKAS
