Pengerami Nerima Pengabang Gawai Betong Negap Semangat Penyerakup Pupu Bansa
BETONG: Semangat penyerakup enggau pengelantang rayat pupu bansa di Sarawak terus ditegap nengah ngatur Pengerami Nerima Pengabang Gawai Dayak diatur begulai Kaban Kunsil Nengeri (ADUN) Layar, Datuk Gerald Rentap Jabu enggau Kaban Parlimen Betong, Dato Dr Richard Rapu ti richah diatur di Balai Lumba SJKC Chung Hua, kena Hari Dua.
Datuk Gerald madah, semangat penyerakup ti nyadi pengering rayat Sarawak meseti terus dijaga enggau ditegap nadai ngira raban bansa, pengarap tauka tirai juru nipak konsep ‘Segulai Sejalai’ ti dikemeran komuniti nengeri tu.
Ku iya, pengerami baka Gawai Dayak ukai semina nyadi pelasar ngerami pesaka budaya komuniti Dayak tang mega nyadi pelasar nyempil kaul komuniti pupu bansa.
Pengerami ti diatur ari pukul 10 pagi nyentuk 2 lemai nya mujur matak urung 1,500 pengusung pupu bansa nyengkaum Iban, Melayu enggau China ti datai ngerichah pengerami nya.
Pengerami nya mega richah agi nengah penatai Sapit Premier Sarawak ti mega Menteri Pekara Wang enggau Ekonomi Baru sereta Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas begulai enggau bini, Datin Amar Doreen Mayang.
Bela datai iya nya Sapit Menteri Pemansang Indu, Nembiak Mit enggau Pengelantang Komuniti Sarawak (Pengelantang Komuniti) Datuk Mohammad Razi Sitam, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, ex-Kaban Parlimen Betong Datuk Robert Lawson Chuat sereta temuai dipebasa bukai.
Nangkan nya, Dato Dr Richard madah ke pengelantang enggau pengawa bebatak asur entara rayat Sarawak diatu nyadi aset beguna nentuka penegap politik sereta pemujur agenda pemansang nengeri.
Ku iya, penegap rama ti entap nentuka perintah ngelanggur enggau bejalaika mayuh inisiatif pemansang ti nemban agi dikena ngubah tikas idup sereta pengelantang rayat.
