DALAT: Pengerami Kaul Sungai Kut Muara terus nyadi pelasar beguna nyaga pesaka asal budaya komuniti Melanau seraya nyempil kaul sereta penyerakup entara komuniti menua.

Menteri Pemansang Indu, Nembiak Mit enggau Pengelantang Komuniti Sarawak ti mega Kaban Kunsil Nengeri (ADUN) Dalat, Dato Sri Fatimah Abdullah madah, tradisyen ti ditampung ari aki ini kitai meseti terus dijaga ngambi rebak biak ulih mereti, ngenang enggau nampung identiti budaya komuniti Melanau.

Iya madah munyi nya maya bejadi Pengerami Kaul Sungai Kut Muara 2026 ti diatur di Gelanggang Futsal Kampung Sungai Kut Muara, kena Hari Dua.

Ku iya, kaul nya pengawa lama ti mandangka pengawa beterima kasih sereta simbolik meresi ari pekara ti enda manah nitih ke pengarap komuniti Melanau dulu suba.

Ku iya, pengawa ‘Memulik Lo Tou Lo Amou’ sereta bejalai beraban ‘Serareng’ enggau ‘Rhabong’ ti mai mayuh pemerindang ke ‘Tugik’ nya entara tradisyen asal komuniti Melanau ti agi dikemeran nyentuk diatu.

Ku iya, pengawa ngatur Pengerami Kaul ukai semina nyaga pesaka budaya, tang mega nyadi pelasar beguna mandangka sejarah, adat asal enggau reti komuniti Melanau ngagai rebak biak.

Ba pengerami sama, Dato Sri Fatimah mega nyua agih belanja Projek Mit Pemansang Menua Pesisir (MRP) ADUN Dalat Taun 2026 Fasa 2 sepenyampau RM693,000 dikena nyukung mayuh program pemansang komuniti enggau pelajar dia.

Ari penyampau nya, sepenyampau RM585,000 diagih ngagai program Komiti Pemansang enggau Pengelikun Genturung Pendiau (JKKK), RM77,000 dikena bejalaika projek komuniti nyengkaum ngatur Pengerami Kaul enggau nyeruri rumah sembiang, seraya RM31,000 diagih ngagai sektor pelajar.

Iya ngarap Pengerami Kaul deka terus dijaga nyadi pesaka budaya komuniti Melanau lalu belanja ti diagih ulih dikena nyaga pengelantang rayat sereta nyukung pemansang kandang endur nya.

Bela datai, pengari Pegawai Pelilih Dalat, Nurul Khairul Nisa enggau Tuai Raban Bansa Kampung Sungai Kut Muara, Muklis. -EDISI UKAS