MIRI: Struktur Fi Foreign Workers Transformation Approach (FWTA) deka ditungkap baru berindik ari timbal bekaul pengirau sereta pejalai ti dibantai mayuh raban bekaul industri enggau gerempung dagang pasal atur struktur fi FWTA.

Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, naka diatu fi ungkup peminta permit gawa enggau ngemaru permit gawa pengereja menua luar sepenyampau RM1,854 baka ti ditetapka dalam kontrak enggau operator servis.

“Taja pia, pengaji udah diberi diskaun 51 peratus ungkup fi ngemaru FWTA ngujungka penyampau ti ditetapka sepenyampau RM904 ungkup tetiap pengawa ngemaru ari Januari 2025 nyentuk June 2026 asil randau entara perintah enggau operator servis.

“Ungkup timpuh Julai nyentuk Disember 2026, pengaji deka diberi diskaun 20 peratus enggau penyampau fi tetiap pengawa ngemaru ditetapka RM1,483,” ku iya nengah siti penerang media kena Hari Minggu.

Iya mega madah, diskaun pengudah Disember 2026 bepanggai ba randau nangkan tu.

Nambah ke nya, Datuk Gerawat madah, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngasuh tungkap nya dipejalai ngambi berati ke empas ngagai industri ti bepanggai ngagai pengereja menua luar kelimpah ngemuntang chara ekonomi numbuh enggau ngemeran atur pengawa ti nemban.

Iya mega madah, tungkap nya deka berati ke empas operasyen ngagai industri seraya nentuka juluk chara moden, nyamin pengelikun enggau ekosistem atur pengereja Sarawak chara digital terus dipejalai.

Iya nyemetak madah ke randau begulai enggau raban industri enggau organisasyen dagang deka nyadi sebagi ari tungkap enggau pengawa nisih nya.

"Sebarang pemutus tauka pekara bekaul struktur fi FWTA deka dipadah pengudah tungkap enggau pengawa nisih tembu dipejalai,” ku iya.

Datuk Gerawat mega nyemetak madah ke sistem ti dulu ukai nadai ungkus tang ungkus nya dipelanja pengaji empu.

Terang iya, FWTA dipejalai nengah konsep Bekunsi Perintah - Kompeni (PPP) nentuka pengawa ngambi pengereja menua luar chara digital nambah penyikar, pengelurus enggau ngemandak timpuh ngemendar lalu nadai nating orang ti mayar pupu.

Ku iya agi, pejalai FWTA udah mujur nginsur taga ari 197 hari ngagai pukulrata 60 hari iya nya nginsur manggai 70 peratus lalu meri pemaik ngagai pengaji nengah langgur operasyen ti manah agi enggau pekara wang nyengenda agi.

Sebedau bejalaika FWTA, Datuk Gerawat mega madah, pengaji melanja mayuh ungkus belalai nyengkaum lenyau asil ketegal tambah 137 hari timpuh nganti tauka jam pengereja enda produktif, pejalai berundang ke opis perintah ungkup atur pengawa, operasyen ti enda ditemu sereta pemar merambu taga, atur jam gawa tauka idar pemansut.

Iya mega madah ke penanggul laun tu ngujungka ungkus peluang ketegal projek tauka kontrak ti tejanggal tauka lepas. - EDISI UKAS