Sapit Premier Sarawak, Datuk Amar Profesor Dr Sim Kui Hian madah, iya deka ngatur penemuai ke Beijing minggu baru ngambi ngulihka pemendar keterubah ari Perintah China bekaul perambu numbuh institusyen pelajar tinggi tebilang nya di Sarawak.

Ku iya, perambu nya udah dipesetuju Perintah Shanghai, Perintah Sarawak enggau Perintah Malaysia, nengah pemendar ari Perintah China aja pekara ti agi diguna diatu.

“Pekara ti agi diguna iya nya pemendar ari Perintah China di Beijing lalu nya kebuah minggu baru aku deka ke Beijing lalu ngarap bulih pemendar kepenudi nya.

“Aku mega udah minta saup Duta Besai Republik Rayat China ke Malaysia nentuka Perintah China setuju ke inisiatif tu,” ku iya.

Iya madah munyi nya maya dirandau pemberita ba pengerami makai lemai serimbai penemuai rasmi Duta Besai Republik Rayat China ke Malaysia, Tuan Yang Terutama (TYT) Ouyang Yujing ti diatur Serakup Gempung China (UCA) Sibu kena Hari Dua.

Datuk Amar Dr Sim ti mega Menteri Pengerai Mensia Mayuh, Pengawa Berumah enggau Perintah Lokal Sarawak madah, pengawa numbuh sekula perubat Universiti Fudan nya beguna amat dikena mutar penanggul suntuk urung 2,000 lutur ba Sarawak naka diatu.

Ku iya, pengudah bulih pemendar, kitai deka meri perati ngagai pemansang enggau numbuh sekula perubat nya.

Nambah ke nya, iya nyemetak madah ke pemansang penau enggau pelajar terus nyadi agenda besai Perintah Sarawak ngemansang modal mensia sereta negap pemansang nengeri.

Ku iya, Perintah Sarawak naka ulih meranak puku ba sektor pelajar nengah bemacham inisiatif nyengkaum pelajar tinggi nadai bebayar enggau bantu belanja ngagai bala nembiak.

Bela datai, Menteri Dagang Temuai, Seni enggau Budaya Dato Sri Tiong King Sing, Konsul Jeneral Republik Rakyat China di Kuching Xing Weiping, Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang, Kaban Kunsil Nengeri (ADUN) Bukit Assek Chieng Jin Ek, ADUN Bawang Assan Dato Sri Wong Soon Koh sereta temuai dipebasa bukai. - EDISI UKAS