MERADONG: Projek nyeruri jalai ari Kampung Rancak Bintangor ke Pasar Bintangor beungkus RM20.035 juta ti dikemendar Perintah Sarawak deka meri pemaik besai ngagai peranak sereta penguna jalai alun dia.

Kaban Kunsil Nengeri (ADUN) Meradong, Datuk Ding Kuong Hiing madah, projek ti dipejalai nengah Agensi Pemansang Delta Rajang (RDDA) nya diatu benung dipejalai lalu ditaga tembu ba timpuh 24 bulan.

Ku iya, projek nya deka nambah tikas pengelantang enggau pengelikun penguna kelimpah nyaup mutar penanggul jalai sekut ti suah nyadi kelebih agi maya jam pulai mansang gawa.

“Pejalai projek tu mandangka pengeran Perintah Sarawak nambah infrastruktur sereta sistem penyambung ke pengelantang rayat,” ku iya lebuh bejaku ba Program Mantar Gawai DUN Meradong ba sekeda rumah panjai ngelingi Tanah Putih, Sungai Petai, Skim B Meradong, Jalan KJD, Ulu Stras enggau Sungai Buloh, kena Hari Dua.

Ku iya baru, pejalai projek nya entara inisiatif Perintah Sarawak diiring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nentuka pemansang ti sebela ulih diasai ke peranak ba kandang menua ulu enggau mengeri mit.

Nambah ke nya, Datuk Ding ngelalau mensia mayuh terus ngetan kerejasama rat enggau perintah nentuka agenda pemansang ulih dipejalai lanchar ke pemaik rayat.

Iya mega meri terima kasih ngagai Perintah Sarawak laban udah ngemendar projek nya ti dikeandal ulih meri empas positif ngagai pemansang ekonomi menua.

Program Mantar Gawai ti datai ba hari ke-23 nya ngemata Datuk Ding ngundang peranak rumah panjai nengah pengawa berandau sereta nyua pemeri serimbai Pengerami Gawai Dayak.

Program nya majak richah lebuh iya ngulu sekeda aktiviti begulai enggau peranak nyengkaum belagu, poco-poco enggau ngajat kelai sukung ngagai pesaka budaya komuniti Dayak.

Bela datai, Sapit Chairman Parti SUPP Pampang Bintangor Chieng Buong Ong, Sekretari Parti SUPP Pampang Bintangor Lau Sie Hing, Tukang Wang Parti SUPP Pampang Bintangor Lee Ngin Soon, Kapitan Wong Mee King, Kapitan Wong Leh Hee sereta Kaunselor Tang Kieh Ming. - EDISI UKAS