Perambu Tambah 17 Penuduk DUN Sarawak Agi Nganti Pemendar Renggat Perintah Besai
KUCHING: Perambu nambah 17 penuduk Kunsil Nengeri (DUN) Sarawak ke udah dikemendarka DUN Sarawak agi nganti pemendar ba renggat Perintah Besai sebedau ulih dipejalaika.
Menteri Dagang Temuai, Industri Kreatif enggau Seni Persembahan Sarawak, Dato Sri Abdul Karim Rahman Hamzah madah, jurai bekaul perambu nya udah dibantai lalu nerima sukung DUN Sarawak urung setaun ke udah.
Ku iya, perambu nya ngaul pengawa nambah penuduk DUN Sarawak ari 82 ngagai 99 penuduk dikena nangkup peminta nengeri diatu.
“Ba Konstitusyen Malaysia, pengawa ngaga entara menua semina ulih diadu pengudah lapan taun lalu kitai udah ngelui ari timpuh nya.
“Kitai ngasai bisi pematut nambah penyampau penuduk DUN Sarawak lalu nya kebuah jurai nya dibantai,” ku iya ba aum media ditu, Hari Lima.
Iya nerang, perambu nya semina ngaul pengawa nambah penuduk DUN Sarawak lalu nadai ngaul penuduk Parlimen.
Ku Dato Sri Abdul Karim, jurai nambah penuduk nya udah dibantai lalu nerima sukung DUN Sarawak sebedau tu.
Iya mega madah, perambu nya dipejalai bepanggai ba pengawa enggau atur ke ditetap nyengkaum entara menua baru sitak bepilih sebedau sebarang ubah ulih digaga.
