SARIKEI: Pengerami GongXiRayaGawai 2026 ti ngempung elemen hari besai Taun Baru China, Hari Raya Aidilfitri enggau Gawai Dayak nyadi lambang pengelantang enggau penyerakup pupu bansa di Sarawak.

Sapit Menteri Kebun Dandang Besai enggau Komoditi ke mega Kaban Parlimen Sarikei, Dato Sri Huang Tiong Sii madah, pengerami nya ukai semina program hari besai aja, tang ngayanka identiti kebendar rayat Sarawak ke seruran ngerami pengelain enggau penuh basa sereta ati lantang.

“GongXiRayaGawai ukai semina nama, tang nyaganka pengasai Sarawak kebendar, ke alai tiga hari besai tiga raban bansa kitai dirami begulai,” ku iya lebuh bejaku ba Pengerami Ngintu GongXiRayaGawai 2026 diatur Serakup Orang Tuai Sarikei di New Fortune Restaurant Sarikei kena Hari Enam.

Iya madah, budaya ngabang ngagai pengerami nerima pengabang, bekunsi pemakai enggau ngerami hari besai nadai ngira tirai juru raban bansa enggau pengarap patut seruran dijaga nyadi ke pugu pengelantang diasai rayat diatu.

Kaban Kunsil Nengeri (ADUN) Repok nya mega meri terima kasih ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah nyadi tuai ke besai juluk narak penyerakup enggau pengelantang raban bansa di nengeri tu.

“Ari embing iya, semangat berami begulai baka GongXiRayaGawai majak disukung lalu nya negapka pengawa nempa Sarawak ti inklusif, lantang enggau maju,” ku iya.

Iya nyemetak madah, penyerakup ukai semina jaku aja, tang chara idup ke udah lama dikemeran rayat Sarawak lalu patut ditegap ke pengelantang enggau pemansang nengeri dudi hari.

Berebak enggau nya, Dato’ Sri Huang bisi nyua pemeri RM25,000 ngagai Serakup Orang Tuai Sarikei ngambi bisi dikena ngatur aktiviti ninting taun.-EDISI UKAS